तस्बिर:एन्फा
नवयुग श्रेष्ठको ह्याट्रिकको मदतमा नेपालले भारतमा जारी दक्षिण एशियाली खेदकुद (साग) को पुरुष फुटबलमा विजयी सुरुवात गरेको छ।
आइतवार सिलोङस्थित नेहेरु रंगशालामा भएको आफ्नो पहिलो खेलमा नेपालले नवयुगको ह्याट्रिकको मदतमा भुटानलाई ५–० गोल अन्तरले पाखा लगाएको हो। भुटानमाथि फराकिलो जित दर्ता गरेको नेपालले जितसँगै सेमिफाइलन प्रबेशलाई बलियो बनाएको छ।
नेपालले खेलको ३६ औं मिनेटमा नवयुग श्रेष्ठको गोलबाट सुरुवाती अग्रता लियो। खेलको ४४ औँ मिनेटमा विशाल राईले गोल गरेपछि नेपाल पहिलो हाफमै दुई सून्यको अग्रता लिन सफल भयो।
खेलको ५१ औँ मिनेटमा अञ्जन विष्टले गोल गर्दै टोलीका लागि ३–० को अग्रता दिलाए भने खेलको७५ औँ मिनेटमा नवयुगले व्यक्तिगत दोस्रो तथा टोलीका लागि चौथो गोल गरे।
यस्तै खेलको ८२ औं मिनेटमा भुटानका दोर्जी दोहोरो पहेंलो कार्ड खाँदै मैदान छोडेपछि १० खेलाडीमा सीमित भएका भुटानविरुद्ध खेलको ८५ औँ मिनेटमा गोल गर्दै नबयुगले ह्याट्रिक पूरा गरे। नवयुगको योसँगै अन्तर्राष्ट्रिय फुटबलमा दोस्रो ह्याट्रिक हो।
नबयुगले यसअघि बंगलादेशमा भएको बंगबन्धु गोल्डकप फुटबलको उपाधि जिताउने क्रममा माल्दिभ्सविरुद्ध ह्याट्रिक गरेका थिए। जुन खेलमा नेपाल ४–१ गोल अन्तरले विजयी भएको थियो।
समुह बी मा रहेको नेपालले आफ्नो दोस्रो खेलमा आउँदो माघ २८ गथते बंगलादेशको सामना गर्नेछ।
