बङ्गलादेशको ढाकामा हुने यु–२३ बङ्गबन्धु कप फुटबल प्रतियोगितामा नेपाल समूह ‘ए’ मा परेको छ।
ढाकास्थित बङ्गलादेश फुटबल फेडरेसन हाउसमा आज भएको गोलाप्रथामा नेपाल समूह ‘ए’ मा परेको अखिल नेपाल फुटबल सङ्घ (एन्फा)ले जनाएको छ।
समूह ‘ए’ मा नै मलेसिया, श्रीलङ्का र बङ्गलादेशको तेइस वर्षमुनि (यु–२३) उमेर समूहका टोली छन्। मलेसिया भने डिफेन्डिङ च्याम्पियन हो।
यसैगरी, समूह ‘बी’मा भने बहराइन, माल्दिभ्स, कम्बोडिया र बङ्गलादेशका राष्ट्रिय टोली छन्। यही पुस २४ गतेदेखि सञ्चालन हुने उक्त प्रतियोगितामा नेपालले आफ्नो पहिलो खेल पुस २५ मा मलेसियाको सामना गर्दै मैदानमा उत्रनेछ।
त्यस्तै, नेपालले दोस्रो खेल पुस २८ गते श्रीलङ्कासँग खेल्नेछ भने ३० गते बङ्गलादेशको सामना गर्नेछ । विभिन्न आठ राष्ट्रले भाग लिएको उक्त प्रतियोगिताका खेल भने बङ्गलादेशको ढाका र जेसोरमा सञ्चालन हुनेछन्। रासस