नेपाली राष्ट्रिय क्रिकेट टीमका प्रशिक्षक पुबुदु दासानायकेले चार वर्षे नेपाल बसाइबाट आफू निकै खुशी रहेको बताएका छन्।
राष्ट्रिय क्रिकेट टीमका प्रशिक्षक दासानायकेले शनिबार काठमाडौको रातोपुलमा नेपाल क्रिकेट स्कुलको उद्घाटनपछि संचारकर्मीसँग कुरा गर्दै आफ्नो नेपाल वसाइ सन्तोषजनक रहेको बताए। चार वर्षसम्म प्रशिक्षकको जिम्मेवारी सम्हालेका दासानायके शनिबार बेलुका क्यानाडा फर्कंदै छन्। दासानायकेले एक महिना पहिले नै प्रशिक्षक पद्बाट राजीनामाको घोषणा गरेका थिए। दासानायकेले प्रशिक्षकको जिम्मेवारी सम्हाल्दा नेपाल विश्व क्रिकेट डिजिभन ४ मा थियो। तर खेलाडीहरुमा रहेको प्रतिभा प्रस्फुटन गराइ दासानायकेले नेपाललाई विश्व क्रिकेट डिजिभन १ मा पुर्याए। दासानायकेको प्रशिक्षणमा नेपालले विश्व ट्वान्टी ट्वान्टी प्रतियोगीतामा सहभागीता जनाइ सम्झनलायक प्रदर्शन गर्यो। दासानायकले खेलाडीहरुको सुधारिएको प्रदर्शन, दर्शक र फ्यानको मायाका कारण चार वर्षे नेपाल बसाइबाट आफू खुशी रहेको बताए।
नेपाल क्रिकेट स्कुलको उद्घाटनका क्रममा दासानायकेले नेपालको क्रिकेट अहिले सही ट्रयाकमा रहेको भन्दै खेलाडीहरुले निरन्तर खेल्ने संरचनाको आवश्यकतामा जोड दिए। खेल संरचनाको पक्षमा आवाज उठाउँदा दासानायकेमाथि नेपाल क्रिकेट संघका पदाधिकारीले राजनीति गर्न खोजेको आरोप समेत लगाए। तर खेलाडीहरुले दासानायकेलाई साथ दिइरहे। खेलाडीहरुको साथकै कारण सरकार दासानायकेको सम्झौता अवधि बढाउन वाध्य भएको थियो। दासानायकेले आफू जागिर खानका लागि नभइ नेपालको क्रिकेट विकासका लागि नेपाल आएको र त्यसमा केही हद्सम्म आफू सफल भएको बताए। उनले खेलाडीहरुलाई छोरा जस्तै मानेर प्रशिक्षण दिएको भन्दै क्यानाडा फर्किए पनि आफूले नेपाल र नेपाली क्रिकेटलाई नविर्सिने बताए।
दासानायकेले खेल संरचनामा परिवर्तन गरी पूर्वाधार निर्माणलाई प्राथमिकता दिए नेपाली क्रिकेटलाई ठूलो फड्को मार्नबाट कसैले रोक्न नसक्ने बताए। उनले यस विषयमा आफूले प्रधानमन्त्री केपी शर्मा ओलीलाई समेत भेटेर अवगत गराएको भन्दै प्रधानमन्त्री ओली क्रिकेटका समस्या बारेमा जानकार रहेकाले चाँडै नै सुधारका कदम चालिनेमा आफू आशावादी रहेको समेत बताए।