अखिल नेपाल फुटबल संघ एन्फाको आयोजनामा भइरहेको पहिलो यु १९ साफ च्याम्पियनसिपको फाइनलको टिकट किन्न दर्शकहरू बिहान ५ बजेदेखि लाइनमा बसेका छन्।
घरबाट बिहान ४ बजे हिँडेका बनस्थलीका राजन थापा ५ बजे लाईनमा पुग्दा आफूभन्दा अगाडि १२ जना बसिसकेका थिए। फुटबलका अत्यान्तै क्रेजी उनी नेपालले खेल्ने हरेक अन्तर्राष्ट्रिय खेल छुटाउँदैनन्। आजको खेलमा सहजै नेपालले जित्ने उनले अनुमान गरेका छन्। ‘यसपाली नेपाली खेलाडीहरू उच्च फर्ममा छन्। भारत केही कमजोर देखिएजस्तो छ। त्यसैले सियोर जित्छ,’ उनले भने,‘हाम्रो यत्रो सपोर्ट छ त्यसै नि जित्छ।’
यस्तै नेपालले खेल्ने हरेक खेल नछुटाउने ४६ वर्षीय रजनी मानन्धर बिहान झिसमिसेमै सातदोबाटो आइपुगिन्।‘त्रिपुरेश्वर हुँदा कुनै खेल छुटाउँदिन थिए, अहिले यहाँ सारे थोरै दर्शक अट्छन् भनेकाले बिहान ६ बजेनै लाइनमा बसेको छु,’ ‘ घरमा छोरीले पनि हेर्ने टिकट ल्याइदिनु है भनेकी छ तर एक जनालाई एउटा मात्र टिकट दिने रे के पो गर्नू?’
२ बजेदेखि हुने खेलका लागि १२ बजेदेखि टिकट बाढ्ने एन्फाले जनाएको छ।
खुमलटारका रोशन बस्नेत पनि फुटबलका क्रेजी हुन्, दशरथ रंगशालामा हुने हरेक खेल नछुटाउने उनी यहाँ पनि भारतसँगको खेल हेर्न बिहान ६ बजे आइपुगेका छन्।
यस्तै सातदोबाटोकी रजनी पनि बिहान ५ बजेदेखि लाइनमा बसेकी छन्। साथीलाई लिएर आएकी उनी नेपालले जित्नेमा ढुक्क छिन्।
यस्तै इमाडोलबाट आएका बिष्णु पनि लाईनमा बसेका छन्। तर उनको अगाडि बरिब २ हजार जतिको लाइन छ। ‘नजिकै हो गइहाल्छु नि भनेर बसियो अहिले टिकटै नपाइएला जस्तो छ,’ उनले भने,‘म टिकाट काटेर ल्याउँछु भनेर घरमा दाइलाई पनि भनेको थिए तर आफैले नपाइला जस्तो छ।
अहिले लाइनमा करिब झन्डै ५ हजारभन्दा बढी बसेका छन्।
एन्फाका अनुसार भिआइपीका लागि ५०० र साधारणतर्फ ३०० टिकटदर तोकिएको छ।