स्कटल्याण्डमा जारी विश्व क्रिकेट लिग डिभिजन च्याम्पियनसीपको दोस्रो खेलमा नेपाल घरेलु टोलीसँग ९ विकेटले पराजित भएको छ।
वर्षाले प्रभावित खेलमा डिएल नियमका आधारमा २२ ओभरमा छोट्याइएको खेलमा स्कटल्याण्डले जितका लागि ११० रन बनाउनु पर्ने भएको आइसिसिले जनाएको छ। यद्यपी हिजो राति फेरि मैदानमा पानी परेपछिआज सुरू भएको खेलमा स्कट्लायंणले १ विकेट गुमाउँदै खेलमा जित हात पारेको क्रिकेट स्कटल्याण्डले जनाएको छ। नेपालका लागि १ विकेट सोमपाल कामीले लिएका थिए।
हिजो खेल रोकिदा स्कटल्याण्डलाई जितका लागि २०.२ ओभरमा ९५ रन चाहिएको थियो।
यसअघि टस हारेर पहिले ब्याटिङ गरेको नेपालले निर्धारित ५० ओभरको खेलमा ४९.१ ओभरमा अलआउट हुँदै १६७ रन बनाएको थियो।
****
नेपालले खराब सुरुवात गर्दै पहिलो १० ओभरमा ३ विकेट गुमाएर ३३ रन मात्र जोड्न सकेको थियो।
स्कटल्याण्डको आयर मैदानमा भएको खेलमा नेपालका लागि शरद भेसवाकरले सर्वाधिक ३० रनको पारी खेले।
ओपनर अनिल मण्डल र महेश क्षेत्रीको जोडी लामो समयसम्म चलेन। महेश क्षेत्री तेस्रो ओभरमा आउट भए। उनले तीन रन मात्र जोडेका थिए। यस्तै पहिलो खेलमा सतक प्रहार गरेका अनिल मण्डल दोस्रो विकेटको रूपमा ९ रनमा आउट भए।
यस्तै उपकप्तान ज्ञानेन्द्र मल्ल पनि सस्तैमा आउट भएका छन्। एलबिडब्ल्यूको धरापमा पर्नुअघि उनले २० बल खेल्दै २ चौकासहित १६ रन जोडे। यस्तै कप्तान पारस खड्का ११ बलमा १० रन बनाउँदै आउट भए। ३४ बल खेलेका प्रदिप ऐरीले १ चौका र १ छक्का सहित १६ रन बनाएर आउट भए। सोमपाल कामीले ७ रन बनाए। उनले १३ बलको सामना गरेका थिए।
यस्तै पृथ्यु बाँस्कोटा ४२ बल खेल्दै १ चौका र १ छक्कासहित १६ रन बनाएर आउट भए। बसन्त रेग्मीले १९ रन बनाए। ४२ बलको सामना गरेका उनले १ चौका प्रहार गरेका थिए। शक्ति गौचन ६ र अभिनाश कर्णले १७ रन बनाए।
घरेलु टोलीका लागि एलेस्डेर इभान्ट्सले १० ओभर बलिङमा १८ रन खर्चेर ३ विकेट लिए। यस्तै गेभिन मेन, माइकल लेस्क र शैफान सरिफले २-२ विकेट लिए।
यसअघि बुधबार भएको पहिलो खेलमा समेत नेपाल स्कटल्यान्डसँगै तीन रनले पराजित भएको थियो। सो खेलमा पनि पानी परेपछि ३६ ओभरमा छोट्ट्याइएको थियो। आठ देश सहभागी उक्त च्याम्पियनसिप सन् २०१९ को इङल्यान्ड र वेल्समा हुने विश्वकपका लागि छनोटको आधार पनि हो। यसबाटै छ टोली दोस्रो चरणमा पुग्नेछन्।
जारी प्रतियोगितामा नेदरल्यान्डस् ४ अङ्कका साथ लिगको शीर्ष स्थानमा तथा हङकङ, केन्या, स्कटल्यान्ड, युएई र नामिबियाले समान दुई दुई अङ्क जोड्दै लिगको क्रमशः तेस्रो, चौथो, पाँचाँै र छैटाँै स्थानमा छन्। त्यस्तै नेपाल साताँै र पपुवा न्युगिनी आठौँ स्थानमा छन्। दुवै टोली अङ्कविहीन छन्।
आइसिसी विश्व लिग क्रिकेट डिभिजन टुमा उत्कृष्ट खेल प्रदर्शन गरेका आधारमा नेपाल उक्त प्रतियोगिताका लागि छानिएको हो। त्यतिबेला नेपाल चौथो स्थानमा थियो। नेदरल्यान्डस् पहिलो, नामिबिया दोस्रो र केन्या तेस्रो भएका थिए।
तस्विरहरूः क्रिकइन्फोडटकम/क्रिकेट स्कटल्याण्ड
