आइसीसीका एसोसिएट र एफिलेटेट राष्ट्रहरुको सबैभन्दा ठूलो क्रिकेट प्रतियोगिता विश्वक्रिकेट लिगको आफ्नो पहिलो खेलमा बुधबार नेपालले स्कटल्याण्डको सामना गर्दै छ।
ट्वान्टी-२० विश्वकप छनौटमा प्रभावशाली प्रदर्शन गरेको स्कटल्याण्डसँग उसकै घरेलु मैदानमा खेल्नु नेपालका लागि सहज हुनेछैन।
एकदिवसीय विश्वकप छनोटको सम्म पुग्ने ढोकाको रुपमा समेत रहेको यो प्रतियोगिता 'होम एण्ड अवे'का आधारमा सञ्चालन हुने गर्छ। प्रतियोगितामा चारवटा एकदिवसीय मान्यताप्राप्त टोलि सहभागी छन् भने बाँकी चार टोलि गएको जनवरीमा नामिबियामा भएको डिभिजन-२बाट छानिएका हुन्।
स्कटल्याण्डमा नेपालले खेल्ने २ मध्ये पहिलो खेल बुधबार हुनेछ भने दोस्रो खेल शुक्रबार हुने छ।
ट्वान्टी-२० विश्वकप छनोटमा खराब प्रदर्शन गरेपछि नेपाली टोलिमा केही हेरफेर गरिएको छ। सुवास खकुरेल र बिनोद भण्डारी अन्तिम १५ मा पर्न सकेनन्। तुलनात्मक राम्रो प्रदर्शन गरेका सागर पुन पनि चोटका कारण टोलिमा परेनन्। महेश क्षेत्री, पृथु बाँस्कोटा र अविनाश कर्णले टोलिमा प्रवेश पाएका छन्।
ट्वान्टी-२० विश्वकप छनोटको अन्तिम खेलमा उत्कृष्ट ब्याटीङ गरेका सिद्धान्त लोहनी पनि टोलिमा छन्। अभ्यासका लागि इंग्ल्याण्डमा रहँदा र नेदरल्याण्डमा चार ट्वान्टी-२०को श्रृङ्खला खेल्दा उनी बेन्चमा नै थिए। नेपाली ब्याटिङ चल्न नसक्दा पनि विश्वकप छनोटका खेलहरु खेल्न नपाएका युवा ब्याट्सम्यान लोहनीले हङकङविरुद्ध १७ बलमा २७ रन बनाएका थिए। उत्कृष्ट डेब्युसँगै विश्वक्रिकेट लिग च्याम्पियनसीप खेल्ने टोलीमा उनले स्थान पाएका हुन्।
एकदिवसीय क्रिकेटका लागि निकै भरपर्दा मानिएका ब्याट्सम्यान ज्ञानेन्द्र मल्लको पनि ब्याट चल्न सकेको छैन। उनी आइसीसीको ट्वान्टी-२० र्याङकिङमा समेत अन्तिम सयबाट बाहिरिएका छन् भने आयरल्याण्डमा कप्तान पारस खड्काको प्रदर्शन पनि सम्झनलायक रहेन।
यस्तो अवस्थामा विश्वक्रिकेट लिगको सुरुवात सुखद बनाउन नेपालका लागि चुनौतिपूर्ण छ।
ट्वान्टी-२० विश्वकप छनोट प्रतियोगितामा क्याच लिँदै प्रदिप ऐरी। तस्बिर: आइसीसी
कप्तान पारस खड्काले लामो युरोप बसाईपछि त्यहाँको वातावरणमा घुलमिल भएकाले बुधबार र शुक्रबार आयरल्याण्डमा खेल्न सहज हुने बताएका छन्। आइसीसीसँग उनले आयरल्याण्डमा आफ्नो टोलिको प्रदर्शन अत्यन्तै कमजोर रहेको भन्दै प्रदर्शन सुधार गर्नैपर्ने बताएका छन्। उनले भने, 'स्कटल्याण्ड राम्रो टोलि हो। तर हामी राम्रो योजनाका साथ मैदानमा उत्रिँदै छौं। हामी सम्पूर्ण शक्ति लगाएर खेल्यौं भने स्कटल्याण्डलाई हराउन सक्छौं।'
स्कटल्याण्डका कप्तान प्रिस्टन मोमसेनले ट्वान्टी-२० विश्वकप छनोटको जितबाट उत्साही भएको आफ्नो टोलि प्रतिभाशाली खेलाडीहरु रहेको नेपालविरुद्ध पनि जित निकाल्न आतुर रहेको बताएका छन्।
खेल स्कटल्याण्डको आयरमा नेपाली समयअनुसार बुधबार दिउँसो साढे ३ बजे सुरु हुने छ।
प्रतियोगितामा नेपाल र स्कटल्याण्ड दुवैले अहिलेसम्म कुनै खेल खेलेका छैनन्। दुई खेलमा शतप्रतिशत जित निकालेको नेदरल्याण्ड ४ अंक सहित शिर्ष स्थानमा छ। दुई खेलमा एक जित र एक हार आत्मसात गरेका हङकङ, केन्या, युएइ र नामिबिया सबैको समान दुई-दुई अंक छ। दुवै खेल हारेको पपुवा न्युगीनीभने अंकविहिन छ।
नेपाल
पारस खड्का(कप्तान), ज्ञानेन्द्र मल्ल, प्रदीप ऐरी, पृथु बाँस्कोटा, महेश क्षेत्री(विकेटकिपर), सोमपाल कामी, अविनाश कर्ण, करण केसी, सिद्धान्त लोहनी, राजेश पुलामी मगर, अनिल कुमार मण्डल, शक्ति गौचन, बसन्त रेग्मी, शरद भेष्वाकर।
स्कटल्याण्ड
प्रिस्टन मोमसेन(कप्तान), रिचि बेरिङटन, केल कोएट्जर, म्याथ्यु क्रस(विकेटकिपर), कन डे लेन्ज, अलास्दियार इभान्स, हमिस गार्डनर, मिचेल लिस्क, गेविन मेन, जर्ज मुन्सी, सफाया सरीफ, क्रेइज वालेन्स, मार्क वाट
रेफ्री: डेविट जुक्स
अम्पायर: इआन र्यामेज र शौन जर्ज
