नेदरल्याण्डले नेपाललाई दोस्रो ट्वान्टी–२० अन्तर्राष्ट्रिय खेलमा१०३ रनले हराएको छ।
टस हारेर पहिले ब्याटिङ गरेको नेदरल्याण्डले निर्धारित २० ओभरको खेलमा ४ विकेट गुमाएर १७२ रन बनाएको थियो।
१७३ रनको लक्ष्य पछ्याएको नेपाल नेदरल्याण्डसामू निरिह रह्यो। १७.४ ओभर खेल्दै नेपाल मात्र ६९ रनमा समेटिएको थियो।
पहिलो ओभरमा ओपनर ज्ञानेन्द्र मल्ललाई १२ रनमा गुमाएको नेपालले दोस्रो ओभरमा विनोद भण्डारीलाई २ रनमै गुमायो।
तेस्रो ओभरको अन्तिम बलमा २ रन बनाएर कप्तान पारस खड्का आउट हुँदा नेपालको स्कोर १९ रन थियो।यस्तै छैठौ ओभरको दोस्रो बलमा ६ रनमा सुवास खकुरेल आउट भए। त्यसपछि आएका राजेश पुलामी मगर पहिलो बलमै आउट भए।
सातौ ओभरको तेस्रो बलमा बसन्त रेग्मी २ रन बनाएर आउट भए। लगत्तै प्रदीप ऐरी शून्यमा आउट भए। एघारौ ओभरको अन्तिम बलमा सोमपाल कामी १४ रन बनाएर आउट भए। यतिखेर नेपालको स्कोर बोर्डमा ८ विकेट गुमेर ४९ रन बनेको थियो।
१४औ ओभरको पहिलो बलमा ४ रन बनाएका अभिनाश कर्ण आउट भए। यस्तै १७.४ ओभरमा १८ रन बनाएका शरद भेसवाकर पनि आउट हुँदा नेपाल सबै विकेट गुमाएर ६९ रनमा समेटियो।
यसअघि नेदरल्याण्डका लागि मिचेल स्वार्टले सर्वाधिक ७६ रन बनाए। यस्तै बेन कोपरले ६६ रन बनाए। नेपालका लागि सोमपाल कामीले २ तथा करन केसी र अभिनास कर्णले १-१ विकेट लिए। चार खेल शृंखलाको पहिलो खेलमा हिजो नेदरल्याण्डसँग नेपाल १८ रनले पराजित भएको थियो।
