राष्ट्रिय खेलाडी कल्याणकारी कोषले गत वैशाख १२ गतेको विनाशकारी भूकम्पका कारण ज्यान गुमाएका ६ खेलाडी र एक खेल पत्रकारका परिवारलाई समान १–१ लाख रुपैयाँ आर्थिक सहयोग प्रदान गर्ने भएको छ ।
कोषका अध्यक्षसमेत रहेका राष्ट्रिय खेलकुद परिषद् (राखेप) का सदस्यसचिव युवराज लामाको अध्यक्षतामा मंगलबार त्रिपुरेश्वरमा बसेको बैठकले आर्थिक सहयोग प्रदान गर्ने निर्णय गरेको राखेपले जनाएको छ ।
हालसम्म उक्त विनाशकारी भूकम्पका कारण जुडोका ३, करातेका २ र क्रिकेटका १ खेलाडीको निधन भएको जानकारी प्राप्त भएको छ । जुडो खेलाडीमा नुवाकोटकात्रय अनिशा डंगोल, निलम डंगोल र नारायण तामाङ रहेका छन् ।
कराते खेलाडीमा तनहुँका चन्द्रकुमार श्रेष्ठ र नुवाकोटका सुरज डंगोल तथा सिन्धुपाल्चोकका क्रिकेट खेलाडी मनोज पण्डित छन् ।
खेल पत्रकारमा गोरखापत्र दैनिकका सुमन भोम्जन छन् । खेल पत्रकार सुमनको हकमा प्राकृतिक विपद्मा परेको हुनाले पछि नजिर नरहने गरी कोषबाट आर्थिक सहयोग उपलब्ध गराउन लागिएको कोषका सदस्य–सचिव दीपक विष्टले जानकारी गराए ।
बैठकले भूकम्पबाट पूर्णरुपमा घर क्षतिग्रस्त भएका राष्ट्रिय तथा अन्तर्राष्ट्रिय खेलाडीलाई २० हजार रुपैयाँ बराबरको राहत सामाग्री प्याकेजस्वरुप प्रदान गर्ने निर्णय पनि गरेको छ ।
