विश्व फुटबल महासंघ (फिफा) ले अखिल नेपाल फटबल संघ (एन्फा) लाई ७५ हजार अमेरिकी डलर बराबरको खेल सामग्री प्रदान गरेको छ ।
बिहीबार आयोजित पत्रकार सम्मेलनमा गत वर्ष फिफाका अध्यक्ष सेफ ब्लाटर नेपाल भ्रमणमा रहेका बेला दिने भनिएको फुटबल सामग्री फिफाका विश्व विकास अधिकृत शाह जी प्रभाकरनले एन्फा अध्यक्ष गणेश थापालाई हस्तान्तरण गरेका हुन् ।
प्रदान गरिएका सामग्रीहरूमा एक हजार थान फुटबल, २७५ थान रातो जर्सी, नीलो जर्सी, जुत्ता, मोजा, ब्याग, प्याड, ट्रयाकसुटलगायत रहेका छन् ।
सामग्री ग्रहण गर्दै एन्फा अध्यक्ष थापाले यी सामग्रीले खेलाडीको खेल अभ्यासमा मद्दत पुग्ने बताए । उनले नेपाली फुटबल जगत्ले खेल पूर्वाधार, खेल स्तर र गोल प्रोजेक्टका क्षेत्रमा एकै साथ काम गरिरहेको बताए । फिफाका अधिकृत प्रभाकरनले आगामी दिन नेपाली फुटबलको विकासमा फिफाले सक्दो सहयोग गर्दै जाने बताएका थिए ।