झापाको विर्तामोडमा सम्पन्न राष्ट्रब्यापी आमन्त्रण बक्सिङ च्याम्पियनसिपमा पुरुषतर्फ पाँच स्वर्ण जित्दै त्रिभुवनआर्मी टिम च्याम्पियन बनेको छ। महिलातर्फ ४ स्वर्णका साथ ससस्त्र प्रहरी बल(एपिएफ) टिम च्याम्पियन बनेको छ।
सोमबार विर्तामोडमा भएको अन्तिम खेलमा पुरुषतर्फ ८ र महिलातर्फ ५ फाइनलमध्ये आर्मीले ५ स्वर्ण जित्यो। एपिएफले पनि समान पाँच स्वर्ण जित्यो। नेपाल प्रहरीले एक स्वर्ण जित्यो।
सोमबार ४८ किलो तौल समूहमा एपिएफकी प्रमिला पाण्डेले काठमाण्डौकी मिना घलेलाई पराजित गर्दै स्वर्ण हात पारिन्। यस्तै ५१ किलो समूहमा एपिएफकी माया चौधरीले रोल्पाकी नङ्जा वुढामगरलाई , ५४किलो समूहमा आर्मीकी मिना गूरुङले प्रहरी कीनिशा तामाङलाई, ५७ किलो समूहमा एपिएफकी सञ्जु लामाले आर्मीकी शिलु डंगोललाई र ६० किलो समूहमा एपिएफकी सरस्वती रानाले आर्मीकी निरु गूरुङलाई पराजित गर्दै स्वर्ण जिते।
सोमबारै भएको पुरुषतर्फ ५६ किलो समूहमा प्रहरीका दिनेश श्रेष्ठले सुनसरीका महेशर आलेमगरलाई पराजित गर्दै स्वर्ण जिते।
६० किलो समूहमा एपिएफका पुर्णबहादुर लामाले आर्मीका दानबहादुर दर्लामीलाई, ६४ किलो समूहमा आर्मीका दिपक श्रेष्ठले प्रहरीका भुपेन्द्र थापालाई, ६९ किलो समूहमा आर्मीका विष्णु घलेले आर्मीकै मिनकुमार गूरुङलाई पराजित गर्दै स्वर्ण जिते।
पुरुषतर्फकै ७५ किलो समूहमा आर्मीका उजिरसिंह थापाले आर्मीकै चिरञ्जिवी बेलवासेलाई पारजित गरी स्वर्ण हातपारे।
८१ किलो समूहमा काठमाण्डौका दिपक महर्जनले आर्मीका दिपेश लामालाई, ९१ किलो समूहमा ललितपुरका म्याक्स बस्नेतले आर्मीका घनश्याम बुढालाई र ९१ किलो भन्दामाथी तौल समूहमा आर्मीका घनश्याम खड्काले काठमाण्डौका सन्देश लिम्बुलाई पराजित गर्दै स्वर्ण हातपारे।
यसअघि आइतबार भएका ४ वटा फाइनल खेलमध्ये महिलातर्फको ४६ किलो तौल समूहमा नेपाल प्रहरीकी दिवाना शेर्माले काठमाडौंकी उर्मिला लामालाई अंंकका आधारमा पराजित गर्दै स्वर्ण पदक जितेकी थिइन्। ६४ समूहमा प्रहरीकै अनुराधा लामाले नेपाल प्रहरीकी मिनास राईलाई पराजित गरी स्वर्ण जितिन्।
आइतबारै भएको खेलमा पुरुषतर्फको ४९ किलो तौल समूहमा एपिएफका विक्रम परियारले एपिएफकै आस तामाङलाई पराजित गरी स्वर्ण पदक जिते।
५२ किलो तौल समूहमा त्रिभूवन आर्मिका प्रेम चौधरीले नेपाल प्रहरीका सुदेश मानन्धरलाई पराजित गरी स्वर्ण पदक जितेका थिए।
च्याम्पियनसिपमा ५४ किलो समूहकी नेपाल आर्मीकी मिनु गुरुङ र ६४ किलो समूहका नेपाल आर्मीकै दिपक श्रेष्ठ वेष्ट बक्सर घोषित भएको बक्सिङका प्रमुख प्रशिक्षक ओम मास्केले जानकारी दिए।
अर्को सेलेक्सन खेल नभएसम्मका लागि अब हुने अन्तराष्ट्रिय खेलमा यिनै विजेताहरु मध्येका खेलाडीले भाग लिने मास्केले बताए।
पूर्वेली युवा परिवारको आयोजना तथा जिल्ला खेलकुद विकास समिति झापा र नेपाल बक्सिङ संघ झापाको सहयोगमा प्रतियोगिता आयोजना भएको थियो।