नेपाली महिला भलिबल टोलीले राजधानीमा जारी प्रथम दक्षिण एसियाली आमन्त्रण महिला भलिबल च्याम्पियनसिपमा विजयी यात्रा जारी राख्दै शीर्ष स्थानमा उक्लिएको छ।
त्रिपुरेश्वरस्थित राष्ट्रिय खेलकुद परिषद् (राखेप) कभर्डहलमा भइरहेको प्रतियोगितामा शनिबार नेपालले बंगलादेशलाई ३-० को सोझो सेटमा हराएको हो। आजको जितसँगै नेपाल ६ अंकसहित अंक तालिकाको शीर्ष स्थानमा उक्लिएको छ।
नेपालले बंगलादेशलाई २५-११, २५-९, २५-१० को सेटमा स्तब्ध बनाएको थियो। यसअघि पहिलो खेलमा शुक्रबार नेपालले माल्दिभ्सलाई पनि ३-०को सेटमै हराएको थियो। यता बंगलादेश भने लगातार दोस्रो खेलमा पराजित भएको छ। पहिलो खेलमा श्रीलंकासँग पराजित भएको थियो।
आजै भएको दोस्रो खेलमा भारतले माल्दिभ्सलाई ३-० को सोझो सेटमा हरायो। प्रतियोगिता अन्तरर्गत आइतबार पहिलो खेलमा श्रीलंकाले र माल्दिभ्स तथा दोस्रो खेलमा नेपालले भारत बिरुद्ध प्रतिस्पर्धा गर्नेछ।
राउण्ड रोबिनका आधारमा सञ्चालित प्रतियोगिता मंगलबार सम्म चल्नेछ। प्रतियोगितमा नेपाल सहित भारत, श्रीलंका, माल्दिभ्स र बंगलादेश सहभागी छन्।