थाइल्यान्ड टेबल टेनिस सङ्घको आयोजनामा आगामी असार २१ देखि २४ गतेसम्म राजधानी बैङ्ककमा हुने सातौँ एसियाली भेट्रान्स टेबल टेनिस प्रतियोगितामा सहभागी हुने नेपाली राष्ट्रिय भेट्रान्स टोलीको आज बिदाइ गरियो।
प्रतियोगितामा धर्मराज बज्राचार्य, धर्म शाही, पन्नालाल श्रेष्ठ, प्रज्वल मैनाली, रविन्द्र जोशी, कोपिला जोशी, मोहन बासुकला र कपुर शर्माले नेपालका तर्फबाट प्रतिस्पर्धा गर्ने छन्।
आज राजधानीमा आयोजित बिदाइ कार्यक्रममा खेलाडीलाई बिदाइ गर्दै राष्ट्रिय खेलकुद परिषद्का सदस्य सचिव युवराज लामाले उत्कृष्ट खेल प्रदर्शन गर्दै सफलता हात पार्न आग्रह गरेका थिए।
अखिल नेपाल टेबल टेनिस सङ्घका अध्यक्ष चतुरानन्द वैद्यले प्रतियोगितामा सहभागी सबै खेलाडी राष्ट्रिय च्याम्पियन भएकाले नेपालको जित हुने विश्वास ब्यक्त गरे।
प्रतियोगितामा एसियाका २२ भन्दा बढी राष्ट्रका खेलाडीको सहभागिता रहने जानकारी दिँदै अध्यक्ष वैद्यले एसियाली स्तरको प्रतियोगितामा नेपालको यो दोस्रो सहभागिता भएको बताए।
यसअघि अस्ट्रेलियामा भएको प्रतियोगितामा नेपालका भेट्रान्स खेलाडीले पहिलोपटक सहभागिता जनाएका थिए। रासस
