क्रिकेटका पारस खड्का र करातेकी गंगादेवी अधिकारी पल्सर स्पोर्टस अवार्डमा वर्षका उत्कृष्ट खेलाडी बने । नेपाल खेलकुद पत्रकार मञ्चले मंगलबार राजधानीको प्रज्ञा प्रतिस्ठानमा आयोजना गरेको ११ संस्करणको कार्यक्रममा दुवैले दोस्रो पल्ट अवार्ड हात पारेका हुन् । यसअघि उनीहरूले २०६६ मा पनि उपाधि चुमेका थिए ।
क्रिकेटका पुवुदु दासानायके र उसुकी चाहाना बम्जन क्रमश वर्षको उत्कृष्ट प्रशिक्षक र युवा खेलाडीमा चुनिए उसुकै झरना गुरुङ वर्षको लोकप्रिय खेलाडी बनिन् नेपाल नेत्रहिन क्रिकेट संघका पवन घिमिरेलाई स्पेशल अवार्ड प्रदान गरिएको थियो ।
यस्तै नेपाली सेनाका विक्रमबहादुर राना उत्कृष्ट पारा एथलिट घोषित भए । नेपाली फुटबलमा महत्वपूर्ण योगदान दिएका राष्ट्रिय टोलीका पूर्व प्रशिक्षक भीम थापालाई लाइफटाइम एचिभमेन्ट अवार्डबाट सम्मान गरिएको थियो ।
पुरुष, महिला र लोकप्रिय विधाका विजेताले पल्सर मोटरसाइकल प्रदान गरिएको थियो । अन्य ५ विधाका विजेतालाई ५० हजार नगद र ट्रफी प्रदान गरिएको थियो । त्यसका साथै विजेताले टाइमेक्स घडी, सामसुङ क्यामरा, जोन प्लेयर्सको गिफ्ट भौचर लगायतका पुरस्कार पाएका थिए ।
अवार्ड कार्यक्रममा नेपालका राष्ट्रिय तथा अन्तर्राष्ट्रिय खैलाडीहरुको क्याटवाक र फेसन सो प्रदर्शन गरेका थिए । यस्तै कार्यक्रममा गायिका सीने गुरुङले गीत गाएकी थिइन् । यस्तै हास्यकलाकार राजा राजेन्द्रले चोटीलो व्यङ्ग्य गर्दै खेलकुद र राजनीतिको चर्चा गरेका थिए । यस्तै कार्यक्रममा उसु खेलाडीले नृत्य प्रश्तुत गरेका थिए ।
को को बने त उत्कृष्ट
वर्षका उत्कृष्ट खेलाडी (पुरुष)-पारस खड्का (क्रिकेट)
नेपाली राष्ट्रिय क्रिकेट टिमलाई इतिहासकै सबैभन्दा सफल वर्ष बनाउनमा महत्त्वपूर्ण योगदान गरेका टिमका कप्तान पारस खड्का वर्षको उत्कृष्ट पुरुष खेलाडीको अवार्ड हात पारे ।
सर्वोत्कृष्ट खेलाडीका अवार्डका लागि खड्काले क्रिकेटकै वसन्त रेग्मी, एथलेटिक्सका तिलकराम थारू, कराँतेका सुनील लामा र फुटबलका भरत खवासलाई पछाडि पारे । उनले २०६६ मा पनि उत्कृष्ट पुरुषको उपाधि जितेका थिए । पारस २०६४ सालको उत्कृष्ट युवा खेलाडी भएका थिए ।
वर्ष २०६९ मा खड्काकै नेतृत्वमा नेपालले आईसीसी विश्व क्रिकेट लिग डिभिजन-४ र एसीसी ट्रफीको उपाधि जित्यो भने राजधानीमै भएको एसीसी ट्वान्टी-ट्वान्टी कपको उपविजेता पनि बन्न सफल रह्यो ।
टिमको मात्र होइन उनको व्यक्तिगत प्रदर्शन पनि वर्ष २०६९मा अब्बल रह्यो । उनले एसीसी ट्रफीमा २ सय ९१ रन बनाउनुका साथै ९ विकेट पनि लिए र म्यान अफ द सिरिज भए । एसीसी ट्वान्टी-ट्वान्टीमा २ सय ७ रन जोडे । ४ विकेट पनि चड्काएपछि म्यान अफ द सिरिज नै बने । डिभिजन-४ मा ८९ रन बनाउँदै ९ विकेट पनि हात पारे । उनकै कप्तानीमा एपीएफले राष्ट्रिय एकदिवसीय र ट्वान्टी-ट्वान्टी क्रिकेट पनि जित्यो ।
'आजको सम्मानले मलाई थप चुनौति थपेको छ,' वर्षको उत्कृष्ट पुरूष खेलाडी भएपछि पारसले भने, 'मलाई यो सम्मानमा मेरो टिमको सबैभन्दा धेरै हात रहेको छ । कोच पुवुदु, टिम, परिवार र सबैलाई धन्यवाद छ ।'
वर्षको उत्कृष्ट खेलाडी (महिला)- गंगा अधिकारी (कराते)
उत्कृष्ट महिला खेलाडी कराँतेकी गंगा अधिकारी भइन् । पौडीकी श्रेया धिताल, फुटबलकी जमुना गुरुङ, उसुकी झरना गुरुङ र फुटबलकै अनु लामालाई पछाडि पार्दै अधिकारीले अवार्ड जितेकी हुन् ।यसअघि गंगाले वर्ष २०६६ मा उत्कृष्ट महिला वर्ष खेलाडीको अवार्ड समेत हात पारेकी थिइन् । उत्कृष्ट महिला खेलाडी भएपछि गगाले मलाई साथ दिने गुरू, संगठन र देश र क्लबलाई धन्यवाद दिएकी थिइन् ।
लोकप्रिय खेलाडी- झरना गुरुङ (उसु)
लोकप्रिय खेलाडीको पुरस्कार उसुकी झरना गुरुङले हात पारीन् । क्रिकेटका पारस खड्का, फुटबलका जगजित श्रेष्ठ, एथलेटिक्सकी केशरी चौधरी र युवा पौडीवाज शिरीष गुरुङलाई पछि पार्दै उनले अवार्ड हात पारेकी हुन् । एसएमएस भोटिङ र फेसबुकबाट गरिएको मतका आधारमा उत्कृष्ट छानिएको हो । पोखरेली उसु खेलाडी झरना गुरुङले एसएमएस र फेसबुक लाइकको आधारमा गरिएको भोटिङमा उनी अवार्ड जितेकी हुन्। गुरुङले सर्वाधिक ७१ हजार ८ सय ६ भोट पाएकी थिइन्।
यसअघि २०६४ मा पहिलो पटक राखिएको यो विधा फुटबलका जुमानु राईले जितेका थिए। त्यसपछि भलिबलकी मन्जु गुरुङ, फुटबलका सन्तोष साहुखल र भलिबलकी सिपोरा गुरुङ र भलिबलकै रमिला तन्डुकार यसअघि लोकप्रिय खेलाडी बनेका थिए ।
उनले अवार्ड जितेपछि आफुलाई जिताउने सम्पूर्ण साथीभाइ र विषेशगरि पोखरेली जनतालाई धन्यवाद पनि दिएकी थिइन् ।
वर्षका उत्कृष्ट युवा खेलाडी युवा- चाहना बम्जन (उसु)
नेपाल वर्ष २०६७ मा उसुको लागि सफलताको वर्ष रहदाँ चाहना बम्जनले विश्वस्तरको पदक भित्र्याएकी थिइन् । चाहनाले मकाउमा भएको चौथो विश्व जुनीयर उसु च्याम्पीयनसिपमा कास्य जितिन । सान्सौ विधामा महिला ६० केजीमा चाहनाले नेपाललाई कास्य पदक दिलाएकी थिइन् । यसका साथै पाँचौ राष्ट्रिय खेलकुदमा कास्यमा चित्त बुझाएकी उनले छैठौ राष्ट्रिय खेलकुदमा स्वर्ण जितेर आफूलाई अब्बल सावित गरेकी थिइन् ।
मकाउमा मुलुका लागि प्राप्त गरेको ऐतिहासिक पदकका लागि जोरपाटीकी १८ वर्षीया चाहनाले उत्कृष्ट युवा खेलाडीको अवार्ड हात पारीन् । उनले कडा प्रतिस्पर्धामा फुटबलकी निरु थापासहित पौडीका शिरिष गुरुङ, क्रिकेटका आकास बिष्ट र व्याडमिन्टनका रत्नजीत तामाङलाई उछिनेकी थिइन् ।
' जित्छु भन्ने सोचेकै थिइन,' अवार्ड पाएपछि निकै भावुक हुँदै उनले भनिन्, मलाई आज निकै खुसी लागेको छ, 'गुरूहरू सबैलाई धन्यवाद छ,' भनिन् ।
प्रशिक्षक-पुबुदु दासानायके, (क्रिकेट)
नेपालले खेलेका सबै अन्तर्राष्ट्रिय एकदिवसिय प्रतियोगितामा उपाधि जिताउन महत्वपूर्ण योगदान गरेको क्रिकेटका क्यानेडियन प्रशिक्षक पुबुदु दासानायकेले प्रशिक्षक विधामा अवार्ड जितेका छन् । उनले उसुका युवराज गुरुङ, करातेका अकबर शाह, पौडीका वाङ्देन लामा र एथलेटिक्सका नरबहादुर शाहीलाई पछाडि पारेका हुन् ।
दासानायकेको नेतृत्वमा गएको वर्ष नेपाली खेलकुद इतिहासमा क्रिकेटबाटै ऐतिहासिक बनाउने क्रममा नेपालले सबै अन्तर्राष्ट्रिय एकदिवसिय प्रतियोगितामा उपाधि जितेको थियो। नेपालले विश्व क्रिकेट डिभिजन लिग ४ तथा एसिसी ट्रफी इलिट कप जितेको थियो। उनकै प्रशिक्षणमा नेपाली राष्ट्रिय टोली पहिलोपल्ट एसिसी २०–ट्वान्टीको फाइनलमा पुगेको थियो। उनकै अग्रसरतामा नेपाल क्रिकेट संघ अन्तर्गत न्याशनल क्रिकेट एकेडेमी पनि स्थापित भएको छ।
लाईफटाइम एचिभमेन्ट अवार्ड- भीम थापा (फुटबल)
नेपाली राष्ट्रिय फुटबल टोलीका पूर्वप्रशिक्षक भीम थापालाई नेपाल खेलकुद पत्रकार मञ्चले यसवर्ष लाईफटाइम एचिभमेन्ट अवार्डबाट सम्मान गरेको छ । सन् १९७१ मा जापानमा भएो यू-१९ एशियाली च्याम्पियनसिपमा नेपाली टोलीको महत्वपूर्ण सदस्य बनेका उनले न्युरोट टिम एनआरटी, ठमेल, महावीर क्लवलगायतबाट क्लव फुटबल खेलेका थिए।
लामो फुटबल जीवनमा उनले खेलाडीबाट प्रशिक्षकसमेत भएका थिए । आफ्नो शारीरिक अवस्थाका कारण फुटबलमा प्रतक्ष्य संलग्न नभएपनि उनले अखिल नेपाल फुटबल संघ एन्फाले एन्फा एकेडेमीको अवधारणा अघि सार्दा त्यसको विस्तृत कार्ययोजना थापाले नै बनाएका थिए ।
अवार्ड ग्रहण गर्दै थापाले आफूले नेपाली फुटबलमा विताएका ४० वर्षलाई अखिल नेपाल फुटबल संघ एन्फा र राष्ट्रिय खेलकुद परिषदले मुल्यांकन गरेकै होला भन्दै उनले अहिले मञ्चले कामको मुल्यांकन गरेका थिए । उनले यो अवार्ड आफुलाई दिइएकोमा दिएकोमा खुसी लागेको र आफूसँग त्यसका लागि धन्यबादको विकल्प नभएको बताए ।
स्पेशल अवार्ड- पवन घिमिरे (नेपाल नेत्रहिन क्रिकेट संघ)
नेपाल नेत्रहिन क्रिकेट संघका अध्यक्ष पवन घिमिरेलाई यसवर्षको स्पेशल अवार्ड प्रदान गरिएको छ । सशस्त्र द्धन्द्धको समयमा २०६० सालमा कालीकोट जुम्ला सडक निरिक्षणको क्रममा गएको बेला तत्कालिन माओवादी विद्रोहीको थापेको एम्बुसमा परि घिमिरेले आफ्ना दुबै आँखाको ज्योति गुमाएका थिए ।
आखाँका ज्योती गुमाएपनि दरिलो आत्मविश्वासले नेपाली खेलकुदमा उदाएका नक्षत्र घिमिरेले नेपालमा २०६४ सालमा स्थापना भएको नेपाल नेत्रहिन क्रिकेट संघमा लागेर उनकै पहलमा नेत्रहिन क्रिकेटका राष्ट्रिय तथा क्षेत्रीय क्रिकेट प्रतियोगिता आयोजना भयो ।
करिब ६ सय ५० जना नेत्रहिन क्रिकेट खेलाडी उत्पादन गराइसकेका घिमिरेले नेपाललाई पहिलोपल्ट गतवर्ष भारतमा नेत्रहिन क्रिकेटको विश्वकपमा समेत डोर्याएका थिए । यस्तै विश्वकै ध्यान केन्द्रित गर्न सफल उनले दृष्टिविहीन महिलालाई क्रिकेटसम्बन्धी प्रशिक्षण दिएर दक्ष खेलाडी उत्पादन गरेका छन् ।
काठमाडौँ बहिरा संघका सल्लाहकार समेत रहेका घिमिरे विश्व नेत्रहीन क्रिकेट परिषदका एसियाली विकास निर्देशक हुन्।
पारा एथलेटिक्स अवार्ड- विक्रम राना(एथलेटीक्स/ क्रिकेट)
यो वर्ष पारा एथलेटिक्सको अवार्ड एथ्लेटीक्स र क्रिकेटका पारा एथलेटिक्स खेलाडी विक्रम रानाले हात पारे । रानाले नेपालको तर्फबाट गत वर्ष लण्डनमा भएको पारा ओलम्पिक र भारतको बैंगलोरमा भएको नेत्रहिन विश्वकप क्रिकेटमा नेपालको प्रतिनिधित्व गरेका थिए । उनले यो अवार्ड पाएको दोस्रो पटक हो बैतडीका ३५ वर्षिय रानाले यसअघि २०६७ मा पनि यो अवार्ड पाएका थिए ।
मंसिरमा राजधानीमा भएको नेत्रहिन क्रिकेट प्रतियोगितामा उनले सर्वाधिक १ सय ५४ रन बनाएका थिए । यस्तै लण्डनमा भएको पारा ओलम्पिकमा १ सय मिटर र २ सय मिटर दौडमा उनले दक्षिण एशियाली कीर्तिमान बनाएका थिए ।
नेपाली सेनामा रहेका रानाले सशस्त्र द्वन्द्वको बेला नुवाकोटमा एम्बुसमा परि आँखाको ज्योति गुमाएका थिए । अवार्ड पाएपछि उनले मेरो आखाँ गुमेपनि देशका लागि केहि गर्न सकेकोमा गर्व गरेका थिए ।
उनले यो अवार्ड पाउँदा आफूलाई धेरै अहिलेसम्मकै सबैभन्दा खुसी लागेको बताए ।
अवार्ड कार्यक्रमको फोटोफिचर
तस्विरहरु प्रकाश लामा र क्रान्ति थापा
.jpg)
.jpg)
.jpg)
.jpg)
.jpg)
.jpg)
.jpg)
