गएराति लुडोगोरेट्ससँग बराबरी खेल्दै लिभरपुलले च्याम्पियन्स लिगमा नकआउट चरण प्रवेशको सम्भावना जिवितै राखेको छ।
लुडोगोरेट्सको घरेलु मैदानमा भएको गएरातिको खेलमा लिभरपुलले लुडोगोरेट्ससँग २-२ गोलको बराबरी खेलेको हो। खेलको तेस्रो मिनेटमा डानी अबेलोको गोलबाट अग्रता लिएको घरेलु टोलीविरूद्ध आठौं मिनेटमा लिभरपुलका रिकी लाम्वर्टले बराबरी गोल फर्काए।
यस्तै खेलको ३७ औं मिनेटमा हेन्डरसनले गोल गर्दै लिभरपुललाई मध्यान्तर अघि २-१ को अग्रता दिलाए।
दोस्रो हाफको ८८औ मिनेटमा टर्जिभले लुडोगोरेट्सका लागि बराबरी गोल गर्दै अंक खोसेको छ।
समूह बीमा रहेको लिभरपुलको ५ खेलबाट ४ अंकसहित तेस्रो स्थानमा छ। यस्तै आजको बराबरीसँगै लुडोगोरेट्सको पनि समान ५ खेलबाट समान ४ अंकसहित अंक तालिकाको चौथो स्थानमा छ।
१५ अंकसहित अपराजित रियल मड्रिड शीर्ष स्थानमा छ ६ अंकसहित एफसी बाजल दोस्रो स्थानमा छ। अब समूह चरणको अन्तिम खेलमा बाजललाई हराउन सके लिभरपुल अन्तिम १६ मा पुग्नेछ।
