डिफेन्डिङ च्याम्पियन क्षेत्र नम्बर १ विराटनगरलाई सात विकेटले हराउँदै क्षेत्र नम्बर ७ जनकपुर राजधानीमा जारी वाई वाई यु-१९ राष्ट्रिय महिला क्रिकेटको उपाधि जितेको छ।
किर्तिपुरस्थित अन्तर्राष्ट्रिय क्रिकेट मैदानमा शुक्रबार भएको फाइनलमा टस जितेर पहिले ब्याटिङ गरेको जनकपुरले निर्धारित २० ओभरको खेलमा तीन विकेट गुमाउँदै १ सय ३१ रन बनाएको थियो। जनकपुरका लागि ममता चौधरीले सर्वाधिक ५५ रनको योगदान दिइन्।
यस्तै अनुराधा चौधरी ३३ तथा सरस्वती चौधरीले २३ रन बनाएकी थिइन्। विराटनगरका लागि सबनम राईले दुई तथा सन्जना बुढाथोकीले एक विकेट लिएकी थिइन्।
१ सय ३२ रन विजयी लक्ष्य लिएर मैदानमा आएको डिफेन्डिङ च्याम्पियन विराटनगर निर्धारित २० ओभरको खेलमा ७ विकेट गुमाउदै १ सय चार रनमा समेटिएपछि जनकपुर ७ विकेटले विजयी भएको हो।
विराटनगरका लागि संगिता राईले सर्वाधिक ३२ रनको योगदान दिइन्। जनकपुरलाई विजयी बनाउन आरती चौधरीले दुई विकेट लिएकी थिइन्।
जनकपुरले २५ हजार रुपैयाँ नगद पुरस्कारसहित उपाधि जित्यो। उपविजेता भएको विराटनगरले १५ हजार रुपैयाँमा चित्त बुझायो। फाइनल खेलकी उमन अफ द म्याच समेत रहेकी जनकपुरकी ममता प्रतियोगिताकै सर्वोत्कृष्ट खेलाडी बनिन्। उनले १० हजार नगद पुरस्कार जितिन्।
यस्तै क्षेत्र नम्बर ६ बैतडीकी विन्दू रावल उत्कृष्ट ब्याट्सउमन तथा क्षेत्रनम्बर ५ नेपालगन्जकी रेखा बिसी बलिङमा उत्कृष्ट ठहरिइन्। दुवैले पाँचपाँच हजार नगद पुरस्कार पाएका थिए। एक सातासम्म चलेको प्रतियोगितामा ९ वटा टिमको सहभागिता थियो।