भारत भ्रमणमा रहेको वेष्ट इन्डिजले बीचमै भ्रमण रद्द गरेको भन्दै भारतले वेष्टइन्डिजसँग करिब ४ करोड ११ लाख अमेरिकी डलर बराबरको क्षतिपूर्ति माग गरेको छ।
भारतीय क्रिकेट बोर्ड बिसिसिआइले वेष्टइन्डिजले बिचमै भ्रमण रद्द गर्नु ठूलो विपद भएको भन्दै डब्लुआइसिबीसँग ४ करोड १० लाख ९७ हजार अमेरिकी डलर क्षतिपूर्ति दाबी गरेको भारतीय सञ्चार माध्यमले जनाएको छ।
बिआइसिसीले डब्लुआइसिबीलाई पत्र लेखेर भ्रमणको तयारीमा भएको भएको खर्च वेष्टइन्डिजले भ्रमण बिचमै रद्द गरेपछि उठ्न नसकेकाले त्यसको क्षतिपूर्ति दिन आग्रह गरिएको हो।
यसैबीच यो विवाद समाधान नभएसम्मका लागि भारतले वेष्टइन्डिजसँग गरेको दुई पक्षिय क्रिकेट सम्बन्धलाई निलम्बन गरिएको बिआइसिसीले जनाएको छ।
बिआइसिसीले १५ दिन भित्र यसबारे कुनै ठोस निर्णय नगरे आफूहरू कानुनी प्रक्रियामा जाने चेतावनी पनि दिएको छ।
पाँच एक दिवसीय, तीन टेस्ट र एउटा ट्वान्टी–ट्वान्टी प्रतियोगिता खेल्न भारत भ्रमणमा रहेको वेष्टइन्डिजले चौंथो एक दिवसीय खेलपछि गत अक्टुबर १७ मा एक्कासी भ्रमण रद्द गरेको थियो।
वेष्टइन्डिजको क्रिकेट बोर्ड र खेलाडीबीच पैसाको विषयमा कुरा नमिलेपछि वेष्टइन्डिजले भारत भ्रमण रद्द गरेको थियो।