दुई दशकदेखि एन्फाको नेतृत्व गर्दै आएका गणेश थापाले भ्रष्टाचार मुद्दामा अनुसन्धानबाट छुटकारा पाउने कुनै उपाय नभएपछि पदको माया मारेका छन्। एन्फा कम्प्लेक्समा पत्रकार सम्मेलन गर्दै उनले कार्यवाहक अध्यक्षमा ललितकृष्ण श्रेष्ठको नाम घोषणा गरेका छन्।
एन्फा केन्द्रीय समिति बैठकको हवाला दिँदै थापाले उपाध्यक्ष श्रेष्ठलाई कार्यवाहक बनाएको बताएका छन्। सार्वजनिक लेखा समितिको अनुसन्धान र निर्देशन अनुसार पद त्याग्न बाध्य थापाले एन्फामा आफ्नो बर्चस्व कायमै राख्न श्रेष्ठलाई ल्याएको बुझाई जानकारहरुको छ।
लेखा समितिले थापासँगै उपाध्यक्ष श्रेष्ठ, महासचिव धीरेन्द्र प्रधान र कोषाध्यक्ष विराटजंग शाहीलाई निलम्वन गरि कारबाही गर्न निर्देशन दिएको थियो।
लेखा समितिलाई चुनौती दिँदै थापाले श्रेष्ठलाई कार्यवाहक दिएर 'टेस्ट' गरेका छन्। उपाध्यक्ष कर्माछिरिङ शेर्पाका अनुसार यो थापाको अर्को 'मनपरि' हो।
'एन्फा कार्यसमिति बैठक बसेको मलाई थाहा छैन,' शेर्पाले भने, 'त्यो भन्दा ठूलो कुरा गणेश थापासँगै कारबाही गर्न भनिएका व्यक्ति कसरी कार्यवाहक हन सक्छन्?'
श्रेष्ठ थापासँगै दुई दशकअघि एन्फामा आवद्व भएका हुन्। एन्फा अध्यक्षसँग निकटस्थ मानिने उनी थापा मुछिएका अधिकांश विवादमा जोडिएका छन्। 'थापालाई लाग्ने विष उनलाई किन लागेन?,' श्रेष्ठलाई च्यापिएकोमा असन्तुष्ट एक पदाधिकारीले भने।