दक्षिण कोरियाको इन्चोन सहरमा भएको १७ औँ एसियाली खेलकुद प्रतियोगिता (एसियाड)अन्तर्गत ब्याडमिन्टनमा नेपालका पुरुष टोली विजयी हुँदै क्वाटरफाइनलमा प्रवेश गरेको छ।
नेपाली खेलाडीले मकाउका खेलाडीलाई ३–० ले पराजित गर्दै क्वाटरफाइनलमा आफ्नो स्थान सुरक्षित गरेको हो। नेपालका रत्नजित तामाङले मकाउका चि वाई वानलाई २१–१२, २१–१६ ले, विकास श्रेष्ठले यु लिउङलाई २१–११, २१–१६ ले र साजनकृष्ण ताम्राकारले होक मान लोउमाथि १२–२१, २१–४ र २१–१८ ले पराजित गरे।
नेपाली महिला टोलीले भने मलेसियासँग ०–३ ले हार भोग्यो। त्यस्तै प्रतियोगिताको महिला एकलतर्फ सरादेवी तामाङ मलेसियाकी लि ल्यान याङसँग २१–४, २१–११ र नङ्सलदेवी तामाङ यिन फन लिमसँग २१–२ र २१–७ ले र शिक्षा श्रेष्ठ च्यु सिन लिमसँग २१–१३ र २१–९ले पराजित भए।
टेनिसमा नेपाल पराजित
आजै भएको टेनिसअन्तर्गतको प्रतिस्पर्धामा नेपाल ताइपेइसँग ०–३ ले पराजित भएको छ। महिला एकलतर्फको खेलमा नेपालका जुम्ल्याहा मायाङ्का र माहिका राणा ताइपेइका चिन वई चान र सु वई सेईसँग पराजित भए।
सोही प्रतिस्पर्धाको महिला डबल्समा विभूति कार्की र विजेसा श्रेष्ठको जोडी हाव चिङ चान र युङ जिन चानको जोडीसँग पराजित भए। पुरुषको टोली इभेन्ट्सको खेल भने भोलि आइतबार हुनेछ।
सेपाकताक्रोमा पनि पराजित
पहिलो पटक एसियाडमा भाग लिएको सेपाकताक्रो खेलमा नेपाल आज पराजित भएको छ। पुरुष डबल्सको छनोट चरणको पहिलो खेलमा अनिल गुरुङ र अमन पोडेको जोडी सिङ्गापुरका खेलाडीसँग २१–१४, २१–७ ले तथा दोस्रो खेलमा अनिल र रुपेश पोडेको जोडी जापानका खेलाडीसँग २१–६, २१–६ को सोझो सेटमा पराजित हुन पुगे।
