विश्व च्याम्पियनलाई जर्मनीमा भब्य स्वागत

विश्वकप फुटबल च्याम्पीयन जर्मनीका खेलाडीहरुलाई स्वदेशमा भव्य स्वागत गरिएको छ। सोमबार ब्राजिलबाट जर्मनी पुगेका विश्वकप विजेता हुने खेलाडीहरुलाई बर्लिनको सडकमा लाखौं फुटबल समर्थकहरुले भव्य स्वागत गरेका थिए ।

छत नभएको खुल्ला बसमा सवार खेलाडीहरुलाई स्वागत गर्न बर्लिनमा आधा दिनपछि कामकाज ठप्प पारिएको थियो । ब्राण्डेनबर्ग गेटमा बनाइएको विशाल स्टेजमा विश्व विजेता खेलाडीहरुले विश्वकपको ट्रफी प्रदर्शन गरेका थिए । खेलाडीहरुसँगै प्रशिक्षक वाकिम लोउको पनि भव्य स्वागत गरिएको थियो।

जर्मनीको लागि यो चौथो विश्वकपको उपाधि हो । तर, अक्टोबर ३, १९९० मा पूर्वी जर्मनी र पश्चिम जर्मनीबीच फेरि एकीकरण भएपछि भने यो पहिला विश्वकपको उपाधि हो । त्यसैले यो उपाधिलाई ‘बर्लिनको पर्खाल भत्काइए’पछिको पहिलो ठूलो उपलब्धि मानिएको छ ।

विश्वकप जितेसँगै जर्मनीमा एकताको ताजा सन्देश फैलिएको बताइएको छ । बर्लिन सहरभरी चाडपर्वको जस्तो माहौल फैलिएको छ । लुफ्थान्सा एयरवेजको बोइङ सेभेन फोर सेभेनमा सवार खेलाडीहरुलाई स्वागत गर्न विमानस्थलमै हजारौं समर्थक पुगेका थिए ।

जर्मनीले यसअघि सन् १९५४, १९७४ र १९९० मा विश्वकपको उपाधि जितेको थियो । (एजेन्सी