साहित्यकार डायमनशमशेरले आफ्नो सर्वाधिक चर्चित उपन्यास ‘सेतो बाघ’मा आधारित सिरियल जीवनकालमै हेर्न चाहेका थिए । सम्भव भएन ।
उनको निधनको अढाइ वर्षपछि बल्ल निर्देशक नीर शाह ‘सेतो बाघ’ पर्दामा उतार्ने तयारी गरिरहेका छन् । त्यो पनि सिरियलमात्र होइन, ठूलो पर्दामा पनि । ‘कात्तिकदेखि सेतो बाघको छायांकन सुरु गर्छौं,’ शाहले सेतोपाटीसँग भने ।
ऐतिहासिक विषयवस्तु भएको डायमनशमशेरको अर्को उपन्यास ‘वसन्ती’माथि पनि शाहले नै फिल्म बनाएका थिए । ‘वसन्ती’लाई पर्दामा हेरेपछि डायमनशमशेरले नै शाहलाई ‘सेतो बाघ’ बनाउन अनुमति दिएका थिए । ‘उहाँ निकै उत्साही हुनुहुन्थ्यो,’ नीर शाहले भने, ‘वसन्ती हेर्नुभएपछि उहाँले ‘सेतो बाघ कम्तीमा पनि ४ एपिसोड हेरेर मर्न पाए हुन्थ्यो भन्नुभएको थियो ।’
ठूलो पर्दामा ‘वसन्ती’ बनाएका शाहले ‘सेतो बाघ’ ठूलो र सानो दुवै पर्दामा उतार्नेछन् । ‘सेतो बाघलाई फिल्म र सिरियल दुवै बनाउने हो, तीन घण्टाको फिल्म र १ सय ५ एपिसोडको सिरियल हुनेछ,’ शाहले जानकारी दिए ।
‘वसन्ती’सँगै ‘सेतो बाघ’लाई पनि सिनेमामा उतार्ने भनेर शाहले डायमन शमशेरसँग प्रतिलिपि अधिकार लिएका थिए । सिरियल मकालु टेलिभिजनबाट प्रसारण हुनेछ ।
‘वसन्ती’मा राजा राजेन्द्रविक्रमकी कान्छी पत्नी र चौतरिया गगनसिंहको सम्बन्ध कोतपर्वको क्लाइमेक्समा सकिएको छ । ‘सेतो बाघ’मा चाहिँ गगनसिंहको पतनपछि नेपाली शासनको बागडोर सम्हालेका जंगबहादुर र उनका छोरा जगतजंगको कथा छ । जंगबहादुरले आफ्नो उत्तराधिकारी जगतजंगपछि शासनसत्ता भाइहरूमा जाने नियम बनाएका थिए । जंगबहादुरको शासनकालपछि श्री ३ हुन भएका षड्यन्त्रको कथा ‘सेतो बाघ’मा छ । जंगबहादुरका भाइ वीरशमशेरसंँग बिहे गर्न कुरा चलाएपनि राजा सुरेन्द्रकी छोरीसँग जगतजंगको प्रेम भएपछि वीरशमशेर र जंगबहादुर परिवारबीच दुश्मनी सुरु भएको थियो ।
शाहका अनुसार ‘सेतो बाघ’मा ऐतिहासिक विषयवस्तु, प्रेम र दुश्मनीका कहानी, र सत्ताको लागि राणाभाइहरूबीच भएको षड्यन्त्रको कथा छन् । ‘त्यसैले फिल्म राम्रो हुने देखेर यसलाई फिल्ममा उतार्ने सोच बनाएको’ शाहले बताए । विश्वका थुप्रै भाषामा अनुवाद भइसकेको ‘सेतो बाघ’ले प्रतिष्ठित मदन पुरस्कारसमेत पाएको छ ।
पुरानो समयको झझल्को दिन ‘सेतो बाघ’ बन्दीपुर, विराटनगर र काठमाडौँका ऐतिहासिक स्थलहरूलाई छायांकन गरिने निर्देशक शाहले बताए ।
नीर सिनेमा एन्जेल हर्स प्रोडक्सनले निर्माण गर्न लागेको ‘सेतो बाघ’का लागि भदौभित्र कलाकार छानिइसक्ने शाहले जानकारी दिए । ‘यसमा करिब ५० जना कलाकार हुनेछन्,’ उनले भने ।
निर्देशक शाहले यसअघि तीन साहित्यिक कृतिमा आधारित वासुदेव, वसन्ती र मसान सिनेमा बनाइसकेका छन् । ध्रुवचन्द्र गौतमको उपन्यास ‘कट्टेल सरको चोटपटक’माथि शाहले बनाएको ‘वासुदेव’लाई नेपालको पहिलो कला सिनेमाका रुपमा चर्चा गरिन्छ । मसान भने गोपालप्रसाद रिमालको चर्चित नाटक हो ।