वरिष्ठ हास्य कलाकारद्वय मदनकृष्ण श्रेष्ठ र हरिवंश आचार्य (मह) सोमबार करिब तीन महिनाका लागि अमेरिका प्रस्थान गरेका छन्।अमेरिका प्रवासमा रहँदा मह जोडीले नेपाली डायस्पोरामा रहेका विभिन्न सामाजिक संस्थाका कार्यक्रममा भाग लिने भएका छन्।
'अमेरिकाका ५० मध्ये २५ राज्यमा यसपटक हामी पुग्ने छौं,' अमेरिका प्रस्थान गर्नुअघि त्रिभुवन विमानस्थलबाट आचार्यले सेतोपाटीसँग भने, 'त्यहाँ हामीले गैर नाफामुलक संस्थाहरूका निम्ति आयोजित सामाजिक कार्यक्रममा माग लिनेछौं।'
अमेरिकामा रहेका नेपालीहरूले विभिन्न राज्यमा आयोजना गर्ने दशैं, तिहार,साहित्यिक गतिविधि, मेला आदि कार्यक्रममा उनीहरू सरिक छन्।
महजोडी लगायत भ्रमणमा आचार्य पत्नी रमिला, छोरा मोहितवंश, मदनकृष्णका छोरा यमन, कालकाकारहरू किरण केसी, शिवहरि पौडेल, वसुन्धरा भूषाल सहभागी छन्। अमेरिकाको सान्फ्रान्सिसकोबाट सुरु भएको महयात्रा वासिङटन पुगेर पूरा हुने छ।