वरिष्ठ गायक/गीतकार तथा संगीतकारको परिचय बोकेका स्व. गोपाल योञ्जनका सार्वजनिक भएका तथा नभएका गीतहरूलाई शनिवार आर्मी अफिसर्स क्लबमा विभिन्न गायक गायिकाहरूले गाएर योञ्जनको सम्झनालाई ताजा गरे।
करिब साँढे दुई घण्टा चलेको सांगीतिक ‘गोपालय’ अनील शाही र उनको समूहले 'ऋतु रङ्ग' बाट प्रारम्भ भएको थियो। गोपालकी नातिनी नवश्री सिंहले 'न फूल चढाएँ' गाइन । उक्त गीतमा पुरुष स्वरमा गोपाल योञ्जनले पर्दाबाट साथ दिदाँ र नातिनी नवश्रीले स्टेजमा गाइन।
त्यसपछि राजु तामाङले 'बिरानो देशको माटोभरि छ नेपालीको नाम लेखेको' गाए। उनले गाएको यो गीत महेन्द्र पुलिस क्लबमा करिब ४५ वर्षअघि प्रस्तुत गरिएपछि दोस्रो पटक ‘गोपालय’मा गाइएको हो। त्यसै गरी उदय सोताङले गोपालको चर्चित गीत 'यति चोखो यति मीठो दिउँला तिमीलाई माया' गाएर मनोरञ्जन प्रदान गरे। यसअघि नारायण गोपालको स्वर रहेको उक्त गीतलाई उदयको स्वरमा रि-रेकर्ड गरिएको हो।
कार्यक्रमका दौरान ‘गोपालय’मा १७ वर्ष अगाडि निधन भएका गोपाल योञ्जनको संगित यात्रालाई ‘गोपालय, नखुलेका सांगीतिक पानाहरु' नामक वृत्तचित्रमा देखाइयो। त्यसैगरी कार्यक्रममा गोपाल योञ्जनका २० वटा सार्वजनिक भएका तथा नभएका गीतहरूको रिरेक्रडिङ गरेर तयार पारिएको ‘गोपालय, केही नयाँ केही पुराना’ नामक गीति एल्बमको पनि लोकार्पण गरियो।
उदय सोताङ, रिमा गुरुङ होडा, मनोज राज, कर्मा ग्याल्छेन, प्राश्ना शाक्य, मिलन अमात्य, रोहित जोन क्षेत्री, बानिका प्रधान र राजु प्रधानले सांगीतिक प्रस्तुती दिएका थिए।कार्यक्रममा गायक गायिकाले योञ्जनका ‘यत्ति चोखो यत्ति मिठो', ‘आजकल म प्रिरतीलाई', ‘चञ्चल मन', ‘तिमी देऊ या नदेऊ' र ‘थिएन कोही मेरो' गरी दुई दर्जन गीत गाएका थिए।