सरकारले कलाकारहरुको वर्गीकरण गर्ने भएको छ। कलाकारहरूलाई दुईवटा वर्गमा विभाजन गरेर वर्गिकरण गर्ने भएको हो। बिहिवार सिंहदरबारमा फिल्मकर्मीहरुसँग छलफल गर्दै दुई स्तरमा कलाकारहरुको वर्गिकरण गरी सरकारी परिचय पत्रको ब्यवस्था गर्ने विषयमा संचारमन्त्री डा. मिनेन्द्र रिजाल सहमत भएका हुन।
मौखिक रूपमा भएको सहमति अनुसार हरेक कलाकार एवं प्राविधिकहरुको वायोडाटामा आधारित पुस्तक चलचित्र विकास वोर्डले तयार गर्ने छ। सोही बमोजिम अतिबिशिष्ट र सामान्य गरी दुई प्रकारको परिचय पत्रको ब्यवस्था गरिने छ।
निर्देशक आकाश अधिकारीले दिएको जानकारी अनुसार यो ब्यवस्थाका लागि सञ्चार मन्त्रालयका सह- सचिवको संयोजकत्वमा एक कार्यदल छिट्टै गठन गरी काम सुरु गर्ने सहमति समेत भएको छ। त्यसैगरी सो कार्ड चलचित्रकर्मीका लागि मात्र नभई रगंकर्मी, साहित्यकार तथा फाइन आर्टसका कलाकारका लागि पनि हुने अधिकारीले बताए।
चलचित्र निर्माता संघका अध्यक्ष राजकुमार राईको नेतृत्वमा अभिनेत्री करिश्मा मानन्धर, शिव श्रेष्ठ,निर्देशक अकाश अधिकारी, निर्माता सुनील कुमार थापा, बाबुराम दाहाल र सञ्चारकर्मी प्रकाश सुवेदीसँगको छलफल पश्चात कलाकारलाई सरकारी परिचय पत्र दिईने विषयमा मन्त्री रिजाल सहमत भएका हुन।
यस कार्ड बाँडिएपछि नेपाली कलाकारहरूले एयरपोर्ट लगायतका ठाँऊहरूमा सामान्य व्यक्तीहरू सरह लाइनमा बस्नु पर्ने जस्ता कुराहरुबाट मुक्ति पाउनेछन्। विदेशका कलाकारहरूले यस किसिमको सुविधा धेरै पहिलेदेखि पाइरहेका छन।