बालबालिकाहरूले रूचाएको जापानी टेलिभिजन कार्यक्रम 'पावर रेन्जर'का नायक स्युन सियोयालाई एकाएक देखेर समता शिक्षा सदनका विद्यार्थीहरु निकै रमाए।
पहिले त उनीहरूलाई यी ३२ वर्षे जापानी नायक आफूले रूचाएका कलाकार हुन् भन्ने थाहा पनि भएन। तर, उनकै ल्यापटपबाट आफूले निर्वाह गरेको सिनेमाको दृश्य देखाएपछि उनीहरू हौसिए।
सियोयाले कक्षाको पाटीमा अंग्रेजी शब्द 'ड्रिम' लेखे। त्यसपछि उनले पालैपालो विद्यार्थीहरूलाई आएर आफ्नो सपनाबारे लेख्न भने।
कसैले एअर होस्टेस बन्ने भने त कसैले शिक्षक। विद्यार्थीहरूका कुङ्फु मास्टर वा बेलायती सेना वा एअर होस्टेस बन्ने सपनासमेत सुनेर यी नायक आफैं पनि निकै पुलकित भए।
उनले विद्यार्थीहरूलाई भने– 'सपना देख्नु पर्छ र आफ्ना सपनाहरूलाई पछ्याउनु पर्छ।'
यी जापानी कलाकारले उनीहरूलाई सुनाए– मैले १० वर्षकै उमेरदेखि काम गर्न थालेँ। १५ वर्षको उमेरमा म नायक बन्न चाहन्थे। र १९ वर्षकै उमेरमा मैले आफ्नो सपना साकार पारे।
लोकप्रिय टेलिभिजन कार्यक्रम 'पावर रेन्जर' जापानमा १० वर्ष पुगिसकेको छ। यो अमेरिकालगायत संसारभरि प्रसिद्ध छ। उनी 'नेपाल रेन्जर' समेत बनाउने तयारीमा छन्।
नेपाल र जापानमा व्यवसाय गर्दै आएका भवन भट्ट संस्थापक रहेको बिबी ट्रष्टको सहयोगार्थ उनले नेपाली र जापानी कलाकार राखेर नेपाल रेञ्जर बनाउन लागेका हुन्। यही ट्रष्टले केही अघि उनलाई लुम्बिनीमा आँखा शिविर संचालन गर्न जापानी डाक्टरहरूसहित नेपालमा ल्याएको थियो।
कलाकार सियोयाले जापानमा दुई दर्जनजति सिनेमा र करिब दर्जन नाटक र टेलिभिजन मुभीमा समेत काम गरिसकेका छन्। 'नेपाल रेन्जर' भने पावर रेन्जरकै निर्माता कम्पनीले नभई आफैंले निर्माण गर्न लागेको नेपाली व्यवस्थापन समूहका एक सदस्यले बताए।
शनिबार नेपाल आएका सियोया सोमबार जापानतर्फ प्रस्थान गरिसकेका छन्। तेस्रो पटक नेपाल आएका उनले प्राकृतिक सौन्दर्य र नेपालीको हार्दिकताले पटकपटक आउन मन लागेको बताए।
'म बालबालिकालाई मन पराउँछु,' समताका विद्यार्थीहरूसँग एकै छिन रमाइलो गरेर फर्कने बेलामा उनले सेतोपाटीसँग भने, 'सबै बालबालिकाले सबैभन्दा पहिले सपना देख्नुपर्छ। म यसैका निम्ति प्रेरिरत गर्न चाहन्छु।'
