नेकपा–माओवादीको सशक्त प्रतिरोधका कारण मतदाता तथा नागरिकता टोली मुगु जिल्लाका विकट गाविसमा पुग्न नसकेपछि सरकारले सशस्त्र प्रहरी परिचालन गरेको छ ।
सशस्त्र प्रहरी बल क्षेत्रीय कार्यालय अत्तरियाबाट २२ जनाको टोलीलाई हेलिकप्टरबाट मुगु जिल्लाको रारा गाविसमा उतारिएको पश्चिमाञ्चल सुरक्षा स्रोतले सेतोपाटीलाई जानकारी दियो ।
रारा गाविसबाट मतदाता टोली शनिबार अगाडि बढ्न खोज्दा माओवादी कार्यकर्ताले उनीहरूलाई अवरोध पु¥याएका थिए । २६ जना नेपाल प्रहरीको सुरक्षा दस्ताले पनि माओवादी अवरोध चिर्न नसकेपछि सशस्त्र प्रहरी परिचालन गरिएको सुरक्षास्रोतले बतायो ।
रारा गाविस– ५ स्थित कच्चीगाउँबाट उकालो लाग्न खोज्दा माओवादी कार्यकर्ताले सरकारी टोलीलाई माथिबाट ढुंगामुढा गरेका थिए । ‘राराबाट माथिका गाउँ जान पहरो छिचोलेर जानुपर्छ, उनीहरुले त्यही पहरोमा आक्रमण गरे,’ एक सुरक्षा अधिकारीले बताए । नेकपा–माओवादीका मध्यपश्चिम हेर्ने पोलिटब्युरो सदस्य खड्गबहादुर विश्वकर्माले आफ्ना कार्यकर्ताले मुगुमा प्रतिरोध गरेको पुष्टि गर्दै भने, ‘हामी मतदाता संकलन जसरी पनि रोकेरै छाड्छौं, यो हाम्रो घोषित नीति नै हो,’ उनले भने, ‘सरकारले सशस्त्र परिचालन गरेर बलमिच्याइँ गर्यो भने हामी पनि त्यही ढंगले प्रस्तुत हुनेछौं ।’
माओवादीले सरकारी टोलीका लागि लगिएको ५ क्विन्टल खाद्यान्न पनि लुटेपछि सरकार विशेष सजग भएको छ । ‘खाद्यान्न लुट्नुले ती गाविसहरुमा माओवादी कार्यकर्ताको उपस्थिति र गतिविधि बाक्लो भएको देखाउँछ,’ एक सुरक्षा अधिकारीले भने, ‘हामी त्यसैले गर्दा बढी सचेत भएका हौं ।’ मुगुबाट संविधानसभा सदस्यमा निर्वाचित नवराज धामीको सक्रियताले जिल्लामा नेकपा–माओवादीको संगठन र गतिविधि व्यापक बन्दै गएको हो ।