काठमाडौं, चैत २२ (सेतोपाटी)– संवैधानिक निकायमा नियुक्तिका लागि बाधा अड्काउ फुकाउको आदेश चुनाव गराउन संविधानसम्मत भन्दै त्यसविरुद्ध परेको रिट बदर गर्न राष्ट्रपति कार्यालयले माग गरेको छ ।
बाधा अड्काउ फुकाउको विषयमा अधिवक्ता चन्द्रकान्त ज्ञवाली र ओमप्रकाश अर्यालले चैत पहिलो साता दायर गरेको रिटमा बिहीबार राष्ट्रपति कार्यालयले लिखित जवाफ पठाउँदै बाधा अड्काउ फुकाउ सिफारिस संविधान बमोजिम नै भएकोले आफूले अनुमोदन गरेको उल्लेख छ ।
अन्तरिम मन्त्रिपरिषद्ले संवैधानिक निकायमा नियुक्तिका लागि संविधानको धारा १५८ अनुसार बाधा अड्काउ फुकाउ गर्न राष्ट्रपतिलाई सिफारिस गरेको थियो । राष्ट्रपति कार्यालयले सिफारिस राजनीतिक दलहरुको सहमतिमा चुनाव गराउने प्रस्ताव सहित भएकोले अनुमोदन गरेको लिखित जवाफमा उल्लेख गरेको छ ।
‘संविधान निर्माण प्रयोजनको लागि समयसापेक्ष रुपमा आवश्यक बन्दोबस्त राजनीतिक सहमतिको आधारमा भएको छ,’ लिखित जवाफमा उल्लेख छ, ‘निर्वाचनलाई सुनिश्चित गर्न कुनै पूर्वाग्रह नराखी सरकारको सिफारिस अनुसार जारी आदेश निश्चित सिद्धान्तमा आधारित छ, दाबी खारेज गरी पाउँ ।’
प्रकाशित मिति: 2013-04-04 18:43:32