नेपाली काँग्रेसका सभापति सुशील कोइरालाले निर्वाचनको विरोध गरिरहेका नेकपा-माओवादी लगायत अन्य ३३ राजनीतिक दललाई पनि सहमतिमा ल्याइने बताएका छन् ।
नेपाल प्रेस युनियन, बाँकेले आयोजना गरेको पत्रकारसम्मेलनमा बोल्दै कोइरालाले निर्वाचन जनताको लोकतान्त्रिक अधिकार भएकाले त्यसको बर्खिलापमा जाने कसैलाई छुट नभएको बताए ।
उनले अहिले सबैको चासो लोकतन्त्र बन्नुपर्नेमा जोड दिँदै राजनीतिक प्रतिस्पर्धाका नाममा जनताको अधिकारको घाँटी निमोठ्न नपाइने बताए ।
'यदि, कात्तिक वा मङ्सिरमा पनि निर्वाचन भएन भने मुलुक सङ्कटमा पर्छ, त्यसपछि जनताको विद्रोहले कसैलाई पनि बाँकी राख्ने छैन।' कोइराललाले सञ्चारकर्मीमाझ बताए ।
अहिलेको राजनीतिक संयन्त्र तोडिदैन बरु त्यही संयन्त्रले नै राजनीतिक मुद्दालाई किनारा लगाउँने बताए ।
उनले नेपाली काँग्रेसप्रति नेपाली जनताको विश्वास बढ्दै गएकाले अबको निर्वाचनमा आफ्नो दल पहिलो हुने दाबी गरेका छन् ।
