संवैधानिक राजनीतिक संवाद तथा सहमति समितिका सभापति डा. बाबुराम भट्टराईले आगामी साउन मसान्त भित्रै सीमांकनसहितको संविधान जारी गर्ने गरी दलहरुवीच सहमति भईसकेको बताएका छन्।
नयाँ बन्ने संविधानमा पूर्ण प्रेस स्वतन्त्रता सुनिश्चित हुनु पर्ने माग गर्दै रिपोर्टर्स क्लब नेपालले बुझाएको ज्ञापन पत्र बुझ्दै भट्टराईले चार दलका शीर्ष नेताहरुवीच सीमांकनसहितको संविधान जारी गर्ने विषयमा सहमति भईसकेको भन्दै आज भोलिमा शीर्ष तहमा सहमति भएर साझा दस्तावेज संविधानसभामा लिएर जाने बताए।
उनले चार दलका शीर्ष नेताहरुले ९० प्रतिशत जनमतको प्रतिनिधित्व गर्ने भएकोले उनीहरुबीच सहमति भएर आउँदा सहमतिलाई अघि बढाउन सजिलो हुने भन्दै शीर्ष नेताहरुको बैठकमा छलफल भईरहेको र सीमांकन सहितको संविधान जारी गर्न सकारात्मक रुपमा अघि बढीरहेको जानकारी दिए।
संवाद समितिको बैठक बाहिर आए जस्तो अनिश्चित रुपमा स्थगित नभएको स्पष्ट पार्दै उनले भने,‘सहमतिको लागि नेताहरु बसेर छलफल गर्दा निष्कर्षमा पुग्न सजिलो होस भनेर बैठक नराखिएको हो। यसलाई अनिश्चित कालिन रुपमा स्थगित भयो भन्नु गलत हो। कित बैठक सुरु भएको र समाप्त भएको बेलामा तपाईहरुलाई राख्नु पर्यो होईन भने बाहिर तपाईहरुले बैठक अनिश्चित रुपमा स्थगित भयो भन्दा म पनि अचम्मित भएको छु। अहिले शीर्ष नेताहरु सम्मिलित समिति ब्यापक र घनिभूत छलफल भईरहेको छ।’
नेताहरु सहमतिको निकट पुगिसके भन्दै उनले अब छिट्टै संविधान जारी हुने दाबी गरे।
भट्टराईले ९० प्रतिशत सभासदहरुको समर्थन प्राप्त गरिसकेका दलहरुले गरेको निर्णयलाई फेरि छलफलमा ल्याउनु परेकाले शीर्ष नेताहरु बसेर दुई तीन दिनमा सहमति गर्दा संविधान छिटो आउने भएकोले नेताहरुको तहमा प्रयास गरिएको बताए।
उनले चार दलवीच भएको १६ बुँदे सहमतिको स्प्रिडमै आफूहरू अघि बढी रहेको स्पष्ट पार्दै जनताले छिटो संविधान चाहेकोले साउन मसान्त भन्दा पहिलानै संविधान जारी गर्ने प्रयासमा आफूहरु रहेको बताए।
संविधान निर्माण गर्नु पर्ने बेलामा शीर्ष नेताहरुको भारत भ्रमणलाई लिएर गरिएको प्रश्नमा उनले भने –‘संविधान नेपालीले नेपालमै बनाउने हो। भारतको सद्भाव र सहयोग हुनु आफ्नो ठाँउमा छ। नेताहरु भारत जानु र आउनुले केही असर पार्दैन।’