संविधानसभाको चौथो ठूलो दल राप्रपा नेपालले पनि प्रश्नावली समिति बहिष्कार गर्ने भएको छ।
गणतन्त्र, धर्मनिरपेक्षता र संघीयताबारे आफ्नो मागमा कांग्रेस र एमालेले सहमति नजनाएपछि राप्रपा नेपालले प्रश्नावली समिति अन्तरगतको उपसमितिको बैठक बहिस्कार गर्ने निर्णय गरेको छ।
प्रश्नावली समितिको कार्यविधि बनाउन गठित उपसमितिको आइतबारको बैठकमा राप्रपा नेपालका प्रमुख सचेतक दिलनाथ गिरीले गणतन्त्र, धर्मनिरपेक्षता र संघीयताबारे प्रश्नावली बनाउनुपर्ने माग गरेपछि बैठकमा कांग्रेस एमालेले असहमति जनाएपछि प्रश्नावली समितिनै बहिष्कार गर्ने भएका छन्।
‘पहिलो संविधानसभाले निर्णय गरिसकेको विषय भएकाले प्रश्न सोध्न मिल्दैन भनेर उहाँहरुले ढोका बन्द गर्ने कुरा गर्नुभो’ गिरीले भने-‘हामीले बैठक बहिस्कार गर्यौं ।’ ‘हामी हार्न तयार छौं । प्रक्रियाबाट हराउनुस्’ भन्दा पनि उहाँहरुले मान्नुभएन’ गिरीले भने-‘यही अस्वस्थामा हामी सँगै हिड्न सक्दैनौं । समिति पनि बहिस्कार गछौं।’
संविधानसभाको माघ ११ गतेको बैठकले विपक्षीको नाराबाजीका वीच प्रश्नावली समिति बनाएको थियो । तर, ७३ सदस्यीय समिति विपक्षी नआएका कारण हाल ४९ सदस्य मात्र छन्।
संविधानका विवादित विषयमा प्रश्नावली बनाउन गठित समितिमा एमाओवादी र मधेसीवादीसहितका १९ दल पनि अनुपस्थित छन् । राप्रपा नेपालले पनि बहिस्कार गरे सत्तारुढ दलहरु मात्र रहनेछन् ।