सरकारले चालु आर्थिक वर्षको रातो किताब (व्यय अनुमान विवरण) भाग दुई समयमै छाप्न नसक्दा बिहीबारदेखि हुने भनिएको विनियोजन विधेयकमाथिको छलफल स्थगित गरिने भएको छ।
राष्ट्रिय योजना आयोगले छपाई गरी संसद सचिवालयलाई उपलब्ध गराउनु पर्ने रातो किताबको खण्ड दुई बुधबार पनि उपलब्ध गराउन नसकेपछि सभामुख सुवासचन्द्र नेम्बाङले बिहिबार बस्ने संसदको कार्यसूचिबाट विनियोजन विधेयकमाथिको छलफल हटाउने तयारी गरिसकेका छन्।
आफ्नै कार्यकक्षमा पत्रकारहरुसँग कुरा गर्दै सभामुख नेम्वाङले भने, सरकारको तर्फबाट आउनु पर्ने रातो किताब अहिलेसम्म नआइसकेकोले भोलीको कार्यसूचिबाट विनियोजन विधेयक माथिको छलफल पर सरेको छ। यसले सचिवालयले तयार पारेको कार्यतालिका नै प्रभावित हुने भएको छ। यसको जानकारी सभामुखले बिहीबारको बैठकमा सदनलाई गराउने छन्।
गत शुक्रबार बसेको व्यवस्थापिका संसदको कार्यव्यवस्था परामर्श समितिको बैठकले विनियोजन शिर्षक माथिको छलफल बिहिबारदेखि शुरु गरी भदौ १५ सम्ममा छलफल टुंग्याउने र भदौ २२ सम्ममा राष्ट्रपतिबाट प्रमाणिकरण गरिसक्ने कार्य तालिका तयार पारेको थियो।
सचिवालय स्रोतका अनुसार योजना आयोगले साउन ११ सम्ममा उक्त पुस्तिका छपाइ गरी उपलब्ध गराउने जानकारी दिएको छ। यदि निधारित मितिमा नै पुस्तिका सचिवालयमा पेश भएमा पनि संसदमा छलफल सुरु गर्न अरु थप एक वा दुइ दिन लाग्न सक्छ।
