अत्याधिक मात्रामा लागुऔषध सेवन गरी जनकपुरमा एक युवकको मृत्यु भएको छ । आईतबार जनपा ७ फलफुल मण्डीमा प्रहरीले एक युवकको शव बेवारीसे अवस्थामा फेला पारेको थियो सो शव जनपा ४ निवासी रामलक्ष्मण साहका २५ वर्षिय छोरा सुरेन्द्र साहको रहेको भनि सनाखत भएपछि शवलाई पोष्टमार्टमको लागि जनकपुर अञ्चल अस्पतालमा पठाएको प्रहरी निरिक्षक गोविन्द पुरीले जानकारी गराएका छन ।
मृतक सुरेन्द्र लामो समयदेखि लागु औषध दुव्र्यसनको शिकार रहेको र सोही क्रममा शनिबार राति उनले ओभरडोज लिएपछि उनको मृत्यु भएको हुन सक्ने अनुमान प्रहरीको रहेको छ । सुरेन्द्रलाई सुधार गृहमा समेत ६ महिना राखिएको उनको परिवारजनले जनाएपनि साथि सँग मिलेर उनले पुनः लागु औषध सेवन गर्न थालेको पारिवारिक स्रोतलाई उधृत गर्दै प्रहरीले जानकारी गराएको छ ।
लागु औषध सेवन गर्नेहरुको संख्या यस क्षेत्रमा दिनानुदिन बढ्दै गएको छ । नेपाली बजारमा सजिलै पाउन नसकिने फेन्सीडिल, नाइट्रोसन र गांजा तथा अन्य लागुऔषधहरु भारतीय बाजारमा सस्तो दरमा पाउने गरिएकोले यस क्षेत्रका युवाहरु सिमा पार गएर आफ्नो लत पुरा गर्ने गरेको प्रहरी उपरिक्षक बसन्त पन्तल बताए ।
यसलाई नियन्त्रण गर्न सिमा क्षेत्रहरु भिठामोड, जटही, जयनगर सहितका नाकाहरुमा कडा चेकजाँचको व्यवस्था गरिएको र सो तहत दिनहुं जसो दुव्र्यसनीहरुलाई पक्राउ समेत गर्ने गरिएको भएपनि यसलाई नियन्त्रण गर्नका लागि सीमा क्षेत्रका भारतीय बजारहरुमा समेत प्रतिबन्धीत औषधी तथा गांजा भागहरु नियन्त्रण गर्नका लागि त्यस क्षेत्रका प्रहरीले सहयोग गरिदिनु पर्ने धारणा उपरिक्षक पन्तको रहेको छ ।