बिजुली नभएपछि आइतबार दिउँसो ३ घन्टा नेप्सेमा सेयर कारोबार ठप्प भयो । नियमित दिउँसो १२ देखि ३ बजेसम्म सेयर कारोबार हुने गर्छ । तर, आइतबार त्यो समयमा लोडसेडिङ भयो । नयाँ पत्रिका दैनिकमा समाचार छ ।
वैकल्पिक व्यवस्था पनि भएन । विद्युत् आपूर्ति भएपछि मात्रै ३ देखि ६ बजेसम्म सेयर कारोबार भयो । बिजुली नभएको र जेनेरेटरमा पनि समस्या देखिएपछि नियमित समयमा बजार सञ्चालन गर्न नसकिएको नेप्सेले जनाएको छ । दिउँसो १२ बजे नै ब्रोकर कार्यालय पुगेका लगानीकर्ताले भने व्यवस्थापन नभएको भन्दै आपत्ति जनाए ।
यसरी लगानी नै असुरक्षित हुने उनीहरूको गुनासो छ । इन्भेस्टर्स फोरमका अध्यक्ष राजकुमार तिमिल्सिनाले देशको एक मात्र धितोपत्र बजार एउटा जेनेरेटरले काम नगर्दा कारोबार नै बन्द गर्नुपर्ने अवस्थामा पुग्नु ठूलो लज्जाको विषय भएको बताए ।
‘यो लगानीकर्ताको भावनामाथिको ठूलो खेलबाड हो,’ उनले भने । कुल गार्हस्थ उत्पादन (जिडिपी)मा करिब ५० प्रतिशत अंश ओगटेको सेयर बजार सरकार र नियामक निकायको प्राथमिकतामा नपर्नु दु:खद भएको तिमिल्सिनाले बताए ।
