असार मसान्तसम्ममा सक्ने लक्ष्यसहित गत माघमा सुरु भएको चुरे संरक्षणसम्बन्धी २० वर्षे गुरुयोजना बनाउने काम अधुरै रहेको छ । असार मसान्तसम्म करिब तीन करोड रुपैयाँ खर्च भए पनि वन विज्ञ विनोद भट्ट नेतृत्वको टोलीले गुरुयोजना समयमै बनाउन नसकेको हो । कान्तिपुर दैनिकमा समाचार छ ।
राष्ट्रपति चुरे-तराई मधेस संरक्षण विकास समिति' का सदस्यसचिव अन्नपूर्णानन्द दासले अझै काम बाँकी भएकाले गुरुयोजना बनाउने म्याद पुस मसान्तसम्म थपिएको बताए । 'असोजसम्ममा मस्यौदा र पुस मसान्तसम्म फाइनल प्रतिवेदन बुझाउनुपर्ने जिम्मेवारी दिइएको छ,' वन मन्त्रालयका सहसचिवसमेत रहेका सदस्यसचिव दासले भने, 'योचाहिँ अन्तिम म्याद हो ।' असारसम्म सक्ने गरी गुरुयोजना तयार गर्ने जिम्मा समितिले गत माघमा वन विज्ञ भट्टलाई दिएको थियो ।
गुरुयोजनाको म्याद फेरि ६ महिना थपिएकाले आर्थिक भारसमेत बढ्ने देखिएको छ । 'गुरुयोजनामा प्रतिमहिना तीन लाख रुपैयाँसम्म पारिश्रमिक लिने विशेषज्ञ छन्,' समिति स्रोतले भन्यो, 'त्यसैले लागत त बढ्छ नै ।'
समितिका पदाधिकारीले भने म्याद थपिए पनि लागत नबढ्ने दाबी गर्दैर् आएका छन् । आर्थिक वर्ष २०७२/०७३ मा कार्यक्रमका लागि समितिमा एक अर्ब ९६ करोड रुपैयाँ बजेट विनियोजन भएको छ ।
प्रकाशित मिति: 2015-08-02 05:51:29
