सशस्त्र प्रहरी जवान भर्नामा सात सशस्त्र प्रहरी (एसपी) सहित ६६ जना दोषी ठहर भएका छन् । भर्ना अनियमितता छानबिनका लागि गठित समितिले सात एसपीसहित ६६ जनालाई दोषी ठहर गरेको हो । सशस्त्र प्रहरी बल प्रधान कार्यालयले प्रहरी नायब महानिरीक्षक (डीआईजी) पुष्पराम केसीको संयोजकत्वमा समिति गठन गरेको थियो । सो समितिले सो निष्कर्षसहितको प्रतिवेदन बुझाएको हो । स्रोतका अनुसार कारबाहीमा पर्नेमा एसपी राजु महर्जन, भुवनेश्वर प्रसाद, मानसिंह मौनी, पदमसिंह ऐर, जनक बोहोरा, दीपक थापा र मानबहादुर शाही रहेका आजको राजधानी दैनिकमा खबर छ ।
छानबिन समितिले बुझाएको प्रतिवेदनका आधारमा दोषी ठहर भएका सबैलाई प्रधान कार्यालयले सचेत, ग्रेड रोक्का, ध्यानाकर्षण र चेतावनीसम्मको कारबाही गरेको छ । चेतावनीका सजाय पाएका अधिकृत तथा जवानहरू राष्ट्र संघीय (यूएन) मिसनमा जान नपाउने प्रधान कार्यालय स्रोतले बताएको छ ।
उनीहरूको बढुवासमेत प्रभावित हुनेछ । सिफारिसकै आधारमा भर्ना छनोटमा जवानमा छानिएका शारीरिक रूपमा अशक्त १३ जनालाई सशस्त्र प्रहरी नियमावली २०६० बमोजिम बर्खास्त गरिएको छ भने पाँचजनालाई तालिमबाट झिकिएको छ । हाललाई तालिम गर्न नसकेका ती पाँचजनालाई अर्को पटक अन्तिम मौका दिइनेछ र त्यसमा पनि तालिम गर्न नसकेको अवस्थामा उनीहरू बर्खास्त हुनेछन् ।
हाल बर्खास्त गरिएकाको ठाउँमा वैकल्पिक उम्मेदवारलाई प्राथमिकता दिइएको सशस्त्र मुख्यालयको भनाइ छ । सशस्त्र प्रहरी जवान भर्नामा स्वास्थ्य मापदण्डविपरीतका व्यक्तिसमेत परेको सूचना पाएपछि सशस्त्र प्रहरी महानिरीक्षक (आईजीपी) कोषराज वन्तले डीआईजी केसीको संयोजकत्वमा छानबिन समिति गठन गरेका थिए । समितिले दुई महिनाभन्दा बढीको छानबिनपछि केही दिनअघि मात्रै आईजीपी वन्तलाई प्रतिवेदन बुझाएको हो । स्रोतका अनुसार यो प्रकरणमा सात एसपीका अलावा नौ सशस्त्र प्रहरी नायब उपरीक्षक (डीएसपी) र १६ निरीक्षक (इन्सपेक्टर) समेत दोषी पाइएकाले कारबाही भएको छ । यस्तै बिल्लादार, जवानदेखि नायब निरीक्षक (सई) सम्म पनि कारबाहीमा परेका छन् ।
भर्ना छनोटमा खटिएका ६ डाक्टरसहित १३ प्राविधिकसमेत कारबाहीमा परेका छन् । चिकित्सकको कमजोरीका कारण छारे र मुटुरोग भएका समेत जवानमा छनोट भएका थिए । छानबिन टोलीले चिकित्सकहरूले नियतवशभन्दा पनि लापरबाही गर्दा अशक्त व्यक्तिसमेत छानिएको ठहर गरेको स्रोतले जनाएको छ । सशस्त्र प्रहरी प्रवक्ता नायब महानिरीक्षक (डीआईजी) नारायणबाबु थापाले जवान भर्नामा संगठनको नीतिविपरीत काम गर्ने बिल्लादारदेखि एसपीसम्मका सबैलाई कारबाही भएको बताए । उनले कानुनी तथा व्यावहारिक त्रुटिका कारण अघिल्लो भर्नामा शारीरिक रूपमा अशक्त व्यक्तिसमेत छनोटमा परेको भए पनि आगामी दिनमा त्यस्तो हुन नदिन संगठन कडाइका साथ अघि बढ्ने स्पष्ट पारे ।
सशस्त्र प्रहरी बलले पाँच महिनाअघि मात्रै बलको पाँचओटै क्षेत्रमा गरी २ हजार ६ सय जवानका लागि दरखास्त माग गरेको थियो । सशस्त्र प्रहरी बलको पूर्व क्षेत्र पकली, मध्य क्षेत्र पथलैया, पश्चिम क्षेत्र पोखरा, मध्यपश्चिम क्षेत्र सुर्खेत र सुदूरपश्चिम क्षेत्र अत्तरियामा गरी २२ हजार २० जनाले आवेदन भरेका थिए । त्यसमा छनोटमा परेकाहरूको तालिम अहिले पाँचओटै क्षेत्रमा भइरहेको छ । यसअघि छनोटमा परेकाको तालिम जारी रहेका बेला सशस्त्र प्रहरी बलले फेरि अर्को चरणको जवान भर्ना प्रक्रिया थालेको छ । पछिल्लो भर्ना प्रक्रियामा सशस्त्र प्रहरी बल प्रधान कार्यालयले यसअघिको भर्ना प्रकरणमा मुछिएर कारबाहीमा परेका दुई एसपीलाई पुनः खटाएको छ ।
