स्वास्थ्य सेवा र शिक्षा क्षेत्रलाई 'मेडिकल माफिया' बाट मुक्त गर्नुपर्ने माग राख्दै नौ दिनदेखि अनशन बसिरहेका डा. गोविन्द केसीले आफूप्रति सहानुभूति नभई आफ्ना माग सम्बोधन गर्न सरकारलाई आग्रह गरेका छन्। अन्नपूर्ण पाेस्ट दैनिकमा समाचार छ ।
अनशन तोड्न आग्रहसहित सोमबार बिहान त्रिवि शिक्षण अस्पतालमा पुगेका मुख्यसचिव लीलामणि पौड्याललाई डा. केसीले भने, 'मलाई सहानुभूति हैन समाधान दिनुहोस्।'
पौड्याललाई केसीले आफूलाई पटकपटक भेटेर समय खेर फाल्नुभन्दा पनि आफूले उठाएका मागलाई सम्बोधन गर्नेबारे छलफल गरी ठोस प्रस्ताव ल्याउन सल्लाह दिएका थिए।
मुख्यसचिव पौड्यालले डा. केसीले उठाएका माग सरकारले गम्भीरतापूर्वक अध्ययन गरिरहेको र त्यसलाई सम्बोधन गर्न प्रधानमन्त्री सकारात्मक रहेको सन्देश सुनाएका थिए। पौड्याल केसी सर्मथक चिकित्सकसँग वार्ता गर्न आइतबार पनि अस्पताल पुगेका थिए।
केसीलाई भेट्न गएका राष्ट्रिय योजना आयोगका उपाध्यक्ष गोविन्द पोखरेलले समस्या समाधानका लागि प्रधानमन्त्रीसँग छलफल अगाडि बढाउने प्रतिबद्धता व्यक्त गरेका थिए।
केसीलाई भेट्न पुगेका एमाओवादी अध्यक्ष पुष्पकमल दाहालले उनका माग सम्बोधन गरेर तत्काल अनशन तोडाउनुपर्ने बताएका थिए।
नेकपा-माओवादीका नेता सीपी गजुरेलले पनि अस्पताल पुगी केसीको अनशनप्रति ऐक्यबद्धता जनाएका छन्। विभिन्न दलका नेता, सरकारी प्रतिनिधि तथा नागरिक समाजका अगुवा सोमबार पनि डा. केसीलाई भेट्न अस्पतालमा पुगेका थिए।
प्रकाशित मिति: 2015-03-31 06:21:29