झुटो बोलेको पत्ता लाग्ने पोलिग्राफ टेष्ट प्रविधि प्रयोगपछि नेपाल प्रहरीले धमाधम अपराधी पक्राउ गर्न थालेको छ । आजको नयाँ पत्रिका दैनिक लेख्छ, अधिकांश पोलिग्राफ टेस्टले अनुसन्धानमा महत्वपूर्ण सहयोग पुगेको अपराध अनुसन्धान विभागका प्रमुख एआइजी सुरेन्द्रबहादुर शाहले बताए ।
पोलिग्राफ टेस्ट अनुसन्धानमा निकै प्रभाकारी देखिएको छ उनले भने अपराध अनुसन्धान प्रक्रियामा उसले ठूलो परिवर्तन ल्याइदिएको छ । गत वर्ष सिरहामा एक व्यक्तिको हत्या भयो । धारिलो हतियार प्रयोग गरी हत्या गरेर मकैवारीमा शव फालिएको थियो । तर घटनामा दोषी पत्ता लगाउन नसकेपछि प्रहरीले चार महिनाअघि शंकास्पद दुईजना व्यक्तिमाथि पोलिग्राफ टेस्ट गरेको थियो । ती शंकास्पद व्यक्तिले नै हत्या गरेको खुल्यो र प्रमाण समेत भेटियो ।
पोलिग्राफ टेस्टले अपराधी पक्राउ गर्न मात्र होइन निर्दोष छुटाउन पनि सहयोग गरेको छ । पक्राउ गरेर हिरासतमा राखी पोलिग्राफ टेस्ट गरेकामध्ये १ सय २७ जना निर्दोष छुटेका छन् । शाहका अनुसार पोलिग्राफले ११ वटा घटनाको सत्यतथ्य खुलेको छ । १६ घटनाको बाटो पहिल्याइदिएको छ ।
