भोकालाई भोजन

नवराज पराजुली

यो दोस्रो कुरा हो कि अहिले नेपालका युवाले कुदाउने मोटरसाइकलमा पेट्रोल छैन। पहिलो कुरा यो हो कि उनीहरुको रगतमा पेट्रोल बग्दैन, भाइचारा बग्छ। आइतबार टेकुको मचली भैरव मन्दिर परिसरमा एमआरआर (मेन्स रुम रिलोडेड)ले आयोजना गरेको सडक भोज कार्यक्रममा २५० भोका पेटलाई निशुल्क खाना खुवाउनु एउटा उदाहरण हो।

यो दोस्रो कुरा हो कि अहिले नेपालका युवाको कोठामा ग्यास छैन। पहिलो कुरा यो हो कि उनीहरुको मन न्यानो भएको ग्यास बालेर होइन। भाइचारको अंकमालले हो।

सोमबार कीर्तिपुरको नयाँ बजारमा एमआरआरले गरेको सडक भोज कार्यक्रममा छ सय चिसा पेटलाई निशुल्क तातो खाना खुवाउनु अर्को उदाहरण हो।

काठमाडौं भोज नै भोजको सहर हो, जहाँ सामान्यतया अघाएकाहरु जान्छन्। तर, यो चरम इन्धन र खाद्य संकटको बेला भोकाका लागि भोज गर्ने एमआरआर के हो? यसको उत्तर सजिलो छ।

सोमबार भोजका लागि कीर्तिपुरमा लाइनमा बसेका दीपक तामाङले विद्यार्थीले एमआरआरका स्वयंसेवकलाई सोधे, ‘दाइ, तपाईं कुन पार्टीसँग जोडिनुभएको छ?’

स्वयंसेवकले एक शब्दमा भने, ‘मनसँग।’

साँझमा सजिलो होस् भनेर महिलाका लागि खाना लिने छुट्टै लाइन थियो। जसबाट त्रिविमा स्नातकोत्तर पढ्दै गरेकी विद्यार्थी गीता भट्टले सोधिन्, ‘तपाईंहरुको नाराचाहिँ के हो?’

स्वयंसेवक नवराज बस्ताकोटीले लगाइरहेको ज्याकेट खोले र पछाडि फर्किए। उनले लगाएको एमआरआरको टिसर्टमा लेखिएको थियो, ‘यस टु ब्रदरहुड।’

२०११ डिसेम्बर ११ मा फेसबुकमा एक सेक्रेट ग्रुपको रुपमा कलेज पढ्दै गरेका तीन युवा ज्ञान मल्ल ठकुरी (हाल अमेरिका) सनम राई (हाल बेलायत) र समल बुढाथोकीले सुरु गरेको यो समूह उनीहरुको उमेर सँगसँगै परिपक्व हुँदैगयो। यो समूहमा अहिले ७२ हजार ६ सय भन्दा धेरै सदस्य छन्। पहिले रमाइलो मात्रै गर्ने यो समूह आजभोलि सामाजिक कार्यलाई रमाइलो ढङ्गले गरिरहेको छ।

नारायण गोपालको सालिक सफा गर्ने, मन्दिरहरु सफा गर्ने, रक्तादान कार्यक्रम गर्ने, बिरामीहरुको उपचारको लागि अर्थ सङ्कलन गर्ने लगायतका काम गरिरहेको यो समूहले गत बैसाखको भूकम्पको बेला सिन्धुपाल्चोकलगायतको विभिन्न जिल्लामा स्वास्थ्यशिविर चलाउँदै राहतसामग्री वितरण गर्नेजस्ता काम गरेको थियो।

यति परिपक्व काम गरिरहेका यस समूहका सक्रिय सदस्य भने सामान्यतः प्लस टुदेखि स्नातकोत्तर पढ्दै गरेका विद्यार्थी हुन्। युवा डाक्टरहरु, इन्जिनियरहरु र बैंकरहरुको पनि सक्रिय सहभागिता रहेको यो समूहले गर्ने कार्यक्रमका लागि आवश्यक खर्च समूह सदस्यबाटै स्वतस्फुर्त जम्मा हुने गरेको छ।

एमआरआरको तीनदिने सडक भोज कार्यक्रम (मंसिर ६,७ र ८) आज माइतीघर मण्डला परिसरमा चार बजे सुरु हुँदै छ। यसका लागि ज्ञान मल्ल ठकुरीले १२० अमेरिकी डलर, हेमन्त लामिछाने (अष्ट्रेलिया) एक सय डलर संकलन गरेका छन्। यसैगरी एक फेसबुक समूह ‘वी मार्च’बाट एक हजार छसय रुपैंयाँ सङ्कलन भएको छ। विशेष गरी यस कार्यक्रमका लागि एमआरआरले चितवनको ‘स्टेप फर चेन्ज’ र ‘लियो क्लब अफ नारायणगढ’सँग सहकार्य गरेको छ। कार्यक्रमका लागि आवश्यक खाद्यान्न र दाउरा चितवनबाटै ल्याइएको छ। अन्य व्यवस्थापन एमआरआर आफैंले गरेको हो।

राष्ट्रिय व्यक्तित्वहरुंको पनि समर्थन पाएको कार्यक्रममा आइतबार राष्ट्रिय फुटबल टोलीका खेलाडी रविन श्रेष्ठ सक्रिय थिए। मंगलबार गायिका सिने गुरुङ स्वंयवसेवकका रुपमा सहभागी हुँदैछिन्।

यो कार्यक्रमचाहिँ ‘अभावमा सद्भाव देखाउन र सरकारलाई प्रतिकात्मक दबाव दिन’ गरिएको एमआरआर प्रबन्धक एवम् कायक्रम व्यवस्थापक विक्रम केसीले बताए। यो समूह फेसबुकमा ‘एक्सक्लुसिभ बोइज ग्रुप’ हो जसमा पुरुष मात्रै सदस्य छन्। तर, यो कार्यक्रममा ‘महिलाहरुसँग पनि सहकार्य गर्नु सुन्दर कार्य भएको’ गो मार्चकी सदस्य क्रिस्टिना रजक भन्छिन्।

यो सडक भोज कार्यक्रमको सुन्दर पक्षचाहिँ के छ भने सामान मिलाउने, कार्यक्रम स्थल सरसफाइ गर्ने खाना पस्कने, भीड व्यवस्थापन गर्नेजस्ता सबै काम एमआरआरको स्वयंसेवकले नाच्दै, गाउँदै र ठट्टा गर्दै गर्छन्।

र, पृष्ठभूमिमा भने देशभक्तिका गीतहरु गुञ्जिरहेका हुन्छन्, जस्तो सोमबार साँझ कीर्तिपुरमा खाना खुवाइरहँदा पृष्ठभूमिमा गुञ्जिरहेको थियोः

रातो र चन्द्र सुर्य जङ्गी निसान हाम्रो

जिउँदो रगतसरी यो बल्दो यो शान हाम्रो....

प्रकाशित मिति: 2015-11-24 13:23:22

प्रतिक्रिया दिनुहोस्