प्रहरीका धेरै उच्च अधिकारी र प्रहरी कर्मचारीहरुले पोसाक परिवर्तन भएको लामो समय भइसक्दा पनि बारम्बार गुनासो गरिरहेका छन्।
११ महिनाअघि प्रहरीले पोसाक परिवर्तन गरेपनि अझैपनि उनीहरुले गनगन गर्न छाडेका छैनन। सशस्त्र प्रहरीसँग प्रहरीको पोशाक मिल्दोजुल्दो भएको र नागरिकमैत्री नभएको भन्दै नेपाल प्रहरीले पोसाक परिवर्तन गरी पूरै निलो कलरको चुस्ता ल्याएको थियो ।
प्रहरी पोशाक परिवर्तन गर्न हुँदैन भनेर त्यतिबेलै प्रहरी संगठनका उच्च अधिकारीले भनेको कुरा प्रहरी नेतृत्वले सुनेको थिएन। प्रहरी महानिरीक्षक उपेन्द्रकान्त अर्यालले केही प्रहरी अधिकारीले दिएको सुझाव लत्याएका थिए।
पोशाक परिवर्तनपछि प्रहरी संगठनमा धैरै प्रहरी अधिकारीले फेरिएको चुस्ता राम्रो नभएको र प्रहरीको मनोवल घटेको भन्दै त्यसलाई पुर्नबिचार गर्न अर्यालको ध्यानाकर्षण गराएका थिए । त्यतिबेला पनि प्रहरी महानिरीक्षक अर्याल चुप बसे।
फेरिएको चुस्ता कस्तो लाग्यो भनेर प्रहरी महानिरीक्षक अर्यालले कहिल्यै आफ्ना कर्मचारीलाई सोध्ने आँट गरेनन् । किनभने उनलाई राम्रोसँग थाहा छ, प्रहरी चुस्तादेखि सबै असन्तुष्ट छन् ।
नागरिक मैत्री बनाउन प्रहरी पोसाक परिवर्तन गरिएको हो भने, प्रहरी महानिरीक्षक अर्याल नागरिकसँग चुस्ताबारे छलफल गर्न तयार हुनुहुन्छ ? प्रहरी कर्मचारी चुस्तादेखि खुसी छन् भन्ने भानमा हुनुहुन्छ भने प्रहरी संगठनभित्रै पोसाकमा बारेमा प्रहरी महानिरीक्षक गोप्य मतदानमा जान सक्नुहुन्छ ?
प्रहरी संगठनको भन्दा सुरक्षा गार्ड सप्लाई गर्ने जिफोएसको पोसाक सयौं गुणा राम्रो रहेको नागरिकहरुले नै बताउँदै आएका छन् । चुस्ता लगाएको २ महिनामा नै खुइलिएको र रंग उडेको प्रहरीले बताएका छन् ।
एक जना नेपाल प्रहरीका डिएसपीले नै मसँग निकै गुनासो गर्नुभयो। पोसाक हुँदै भएन, कामै नलाग्ने भयो भन्नुभयो। पोशाक लगाउँदा आफूहरुलाई प्रहरी हुँ भन्ने भान नहुने बताउँदै उहाँले एक दिन ड्युटी सकेर घर फर्कदा छिमेकीहरुले नै जिस्काएको प्रसंग सुनाउनुभयो। छिमेकीहरुले पुलिस ड्रेस पनि पालेको जस्तो ल्याएको भन्दै खिल्ली उडाएपछि मसँग उनीहरुलाई फर्काउने जवाफ भएन भनेर त्यसबेला उहाँले भन्नुभएको थियो।
२०७० मंसिर १ गते प्रहरी महानिरीक्षकको सपथ खाएको दिन महानिरीक्षक अर्यालले प्रहरी संगठनभित्र सुशासन र भ्रष्टाचारबारे लामो भाषण गरेका थिए। पोसाक परिवर्तनबारे पनि ठूलै भ्रष्टाचार भएको हल्ला सुनिन थालेको छ।