म जन्मेको पुरै गाँउ मेरो घर- परिवार एमाले पार्टीमा आस्था राख्दैनथे। २०४६ सालपछि पछिल्लो चुनाव सम्मपनि उनीहरूले एमालेलाई भोट हालेनन्। पहिलो संविधान सभाको चुनाव अगाडि घरमा सल्लाह भयो- भोट कसलाई हाल्ने भनेर। म बाहेक सबैको एकमत भयो पहिलादेखि जुन पार्टीलाई भोट दिइ आइएको छ त्यसैमा दिने भनेर। मैले परिवारलाइ सिधै भन्दिए तपाईंहरु जसलाइ मन पर्छ त्यसैलाई भोट हाल्नुस्। मेरो भोट एमालेलाई दिन्छु।
त्यो भोट मेरो जिन्दगीको पहिलो भोट थियो ।
मैले खुल्लमखुल्ला त्यो भोट एमालेलाइ दिएँ। कारण थियो - स्वर्गीय प्रधानमन्त्री मनमोहन अधिकारीको पालामा भएका विकास। त्यहि बेलामा मेरो घर माथिबाट मोटर बाटो खुलेको थियो। त्यतिबेला छोटो समयमा एमालेले थुप्रै राम्रा काम गरेको थियो। हो त्यति बेला एमालेले गरेको राम्रो कामले गर्दा म एमालेको ऋणी भएको थिएँ।
दोस्रो संविधान सभाको चुनावका बेला म देश बाहिर थिएँ, भोट हाल्न नपाए पनि एमालेको पक्षमा वकालत गर्थें। एमालेले स्पष्ट जित हासिल गरोस् । एकलौटी सरकार बनाओस्, देशलाई उत्कृष्ट संविधान देओस् र मनमोहनको पालामा जस्तै देश विकास गरोस् भन्ने चाहना थियो।
यो पालि एमाले दोस्रो स्थानमा उक्लियो। एमालेमा थुप्रै योग्य, क्षमतावान युवा हुँदाहुँदै पनि नेपाली राजनीतिका सर्वाधिक बद्नाम अनुहार र जनताको नजरमा गिरेका ब्यक्ति बामदेब गौतम संयुक्त सरकारमा उप- प्रधानमन्त्री सहित गृहमन्त्रालय सम्हाल्ने गरेर एमालेको नेतृत्व गर्दै सरकारमा गए।
सरकारमा गएपछि बामदेवले आफ्नो नानीदेखि लागेको बानी बदल्न सकेनन्। र मनपरी ' साम्भा 'नाच देखाउन थालिहाले। कहिले पुलिसका एसएसपी रमेश खरेलसँग झगडा गर्ने, कहिले संक्रमण कालमा बलात्कार सामान्य भन्दै 'तुच्छ' अभिब्यक्ति दिने। अनि नेपालमा कम्प्युटर चलाउन जान्ने दक्ष जऩशक्ति नभएको भन्दै अनलाइन भिषा इन्ट्री प्रणाली विदेशीलाई दिने विवादास्पद निर्णय गरे।
केपी ओली ज्यु, तपाईं एमालेको अध्यक्ष भैसकेपछि एउटा भाषणमा मन्चबाट भावुक हुदै भन्नुभएको थियो - मेरो तपाईंहरुको जस्तो लामो उमेर छैन, मैले छोटो समयमै सार्थक काम गरेर देखाउँनु छ। म त्यो काम गर्छु। खै त ओली ज्यु, तपाईंले भन्नुभएको सार्थक काम देख्न पाएको? तपाईंले भन्नुभएको सार्थक काम कि मन्त्री बदल्ने अनि सबैलाई पालो दिने हो?
तपाईंको पार्टीका कृषि मन्त्रीले दुनियाँको अगाडि चेलिबेटी, आमा, दिदीहरुको इज्जतमा धावा बोल्दा र निर्लज्जताको अन्तिम सिमाना पार गर्दा किन कारबाही गर्न सक्नु हुन्न ?
सूर्यलाइ हत्केलाले छोप्न सकिन्न ओली ज्यु, त्यस्तै त्यो भिडियो हेर्ने लाखौ जनता अन्धा छैनन् र विवेकहीन पनि छैनन्, न त मन्त्रीलाई बिना कारण पुर्वाग्रही ढंगले आरोप लगाएका हुन्। भिडियोमा प्रस्टै देखिएको छ , तपाईंको मन्त्रीको कुदृष्टि।
मन्त्रीको दबाबमा मुलपानीका किसान समूहले केही नभएको प्रष्टिकरण दिउन्, चाहे कृषि मन्त्रीले आफ्नो बचाउ गरुन्। त्यहाँ गलत भएकै छ। कृषि मन्त्रीले देखाएका यो घटियापनदेखि आज सारा नेपाली आक्रोशित बनेका छन्। लज्जित छन्।
सिर्फ एउटा मन्त्रीसँग मात्र होइन सिंगो एमाले पार्टी बदनाम भएको छ। तपाईं पार्टी अध्यक्ष बदनाम हुनुभएको छ। तपाईंको पार्टीका कैयौं इमान्दार कार्यकर्ताको शिर झुकेको छ।
पहिला-पहिला एमालेलाई गुन्डाहरुको पार्टी भन्थे अब यौन दुराचारीहरुको पार्टीको अर्को बिल्ला नथपियोस्।
बामदेम गौतमले बलात्कार सामान्य भन्ने, अर्को मन्त्री खुलेआम महिलाको अस्मिता माथि धावा बोल्ने। हामी कुन दुनियाँमा छौं? जहाँ मन्त्रीलाई आफ्नो पदको मर्यादा थाहा हुँदैन।
एमाले पार्टी अहिले दोस्रो ठुलो पार्टी बनेको छ। जनताले बिश्वास गरेर तपाईंको पार्टीलाई दोस्रो ठुलो पार्टी बनाए। अब तपाईंले बनाएका मन्त्रीहरुले यस्तै हर्कत देखाइरहे , तपाईंले आँखा चिम्लेर उनीहरुको दुष्कार्यलाई मौन समर्थन गरिरहनु भयोभने, तपाईंको एमाले पार्टी अर्को चुनावसम्म रहन्छ कि रहन्न भन्न सकिन्न।
हाल: इजरायल