विहानैदेखि सामाजिक सञ्जालहरुमा सेतोपाटीमा छापिएको समाचारलाई लिएर टीका टिप्पणी भइरहेका थिए। आफ्नो टाईमलाईनमा आएका जति सबै जसो विचारहरू पढिरहेकी थिए।
कसैका भनाई एकदमै नकारात्मक थिए त कसैका सकारात्मक। तर ति सबै विचारहरू पढ्दै गर्दा पनि मैले कुरोको चुरो पत्ता लगाउन सकेकी थिईन्। जान्न एकदमै मन थियो र अनि मोवाईलमै समाचारको लिंक खोलेर पढेँ।
अचम्म लाग्यो, केटीहरुले लगाउने लुगाका कारण दुर्घटना हुन्छ भन्ने कुरा पढेर। र अचम्म लाग्यो त्यही कुरालाई प्राथमिता दिएर समाचार प्रकाशन गरेको देखेर।
त्यही समाचारमा उठाएका कतिपय कुराहरुलाई आधार मानेर भन्ने हो भने स्कुटरमा बिहान कलेज जान लागेकी केटीलाई ट्रकले ठक्कर दिन्छ र घाईते हुन्छे, के त्यहाँ ऊ हाफ पाईन्टमा थिई?
गीत रेकर्डिङको लागि स्टुडियो जादै गरेकी एउटी गायिका तिघ्रा देखिने लुगा लगाएर गएकी थिई र उसलाई दुईवटा माईक्रोको बीचमा चेपिएर मर्नु पर्यो?
बबरमहलको व्यस्त सडकमा स्कुटर दुर्घटनामा परेर ज्यान गुमाएकी शान्ति हमालले मंसिरको काठमाडौँको जाडोमा गलन्दिले नाक मुख छोपेर आँखा मात्रै देखाउँदा दुर्घटनामा परिन् र?
केटी मान्छे छोटो लुगा लगाएकै कारण दुर्घटनामा पर्छन् भने केटाहरु त पुरा लुगा लगाएर हिड्ने भएकाले कहिले कहि कतै दुर्घटनामा नपर्नु पर्ने हैन र? तर किन पर्छन् त उनिहरू? किन मर्छन् उनीहरु पनि? किन घाईते हुन्छन उनिहरु?
कुनै पनि कुरालाई लुगामा लगेर दोष लगाउनु के ठीक हुन्छ?
बाटोमा बसेर केहीबेर मात्रै नियाल्ने हो भने छोटो लुगा लगाएर स्कुटर चलाउनेभन्दा लामो लुगा लगाएर स्कुटर र बाईक चलाउनेको जमात धेरै देखिन्छ। तर सेटोपाटीको समाचार भित्र हरेक केटीले छोटो लुगा लगाउँछन् र दुर्घटना हुन्छ भन्ने आसयको कुरा छ। तर, उहाँहरुले कहिले मूल्यांकन गर्नु भएन कि स्कुटरभन्दा धेरै बाईक चलाउने र आफूलाई हिरो सम्झीनेहरु पनि दुर्घटनामा परेका हुन्छन् भनेर।
र रह्यो हाछेथुको कुरा, उहाँले भन्नुभएका कुराहरू केही हदसम्म ठीक छन् तर धेरै कुरामा मेरो आपत्ति।
उहाँले पत्ता लगाउनु भएको मुखमा मास्क, हेल्मेट, हेल्मेटको फिता बाध्ने र छोटो स्टक, हाफ पाईन्ट र चप्पल दुर्घटनाको सामान्य कारण भनेर। तर, के हरेक दुर्घटना भएका स्कुटर चालकले हाफ पाईन्ट, छोटो स्कट र चप्पल लगाएका थिए र?
तपाईलाई मेरो प्रश्न? आजसम्म राजधानी र राजधानी बाहिर जति पनि दुर्घटना भए ति सबैले त्यस्तै लुगा लगाएका थिए त? यदि त्यसो हो भने कलेज ड्रेसमा स्कुटर चलाएकि किशोरीको दुर्घटना कसरी भयो? मंसिरको जाडोमा बबरमहलमा स्कुटर कुदाउँदै गरेकी युवतिको दुर्घटना कसरी भयो?
हो स्कुटर र बाईक अरू सवारी साधनको तुलनामा असुरक्षित हुन्छन्। तर, यसको मतलव यो हैन कि, त्यो असुरक्षालाई मापन गर्ने काम उनीहरुले लगाएको लुगाले गरिरहन्छ, यसको मतलत यो होइन कि दुर्घटना हुनुमा चालकको पहिरन अग्रस्थानमा आउँछ, यसको मतलब यो हैन कि हरेक केटी छोटो लुगा लाउछन् र दुर्घटनामा पर्छन्।
लामो लुगा लगाउने, टाउकोदेखि कुर्कुचासम्मको पहिरन लगाउँदैमा दुर्घटना हुदैन र? दुर्घटना रोक्ने अन्य उपायहरु पनि छन्। आफ्नो सवारी साधान नियमीत चेक गर्ने, आफ्नो लेनमा तोकिएको गतिमा चलाउने, तिब्र गति र ओभरटेक नगर्ने, प्रतिश्पर्धा गरेर सवारी नचलाउने हो भने पनि त दुर्घटना कम गर्न सकिन्छ नि।
अर्को कुरा हेल्मेटको। हेल्मेट र कपालको जुरोवीच के सम्बन्ध। हेल्मेट टाउकोलाई सुरक्षा दिनको लागि लगाईन्छ, जुरो सुन्दरताको लागि। हेल्मेटले दुर्घटना हुँदा टाउको बचाउन पो मद्दत गर्छ, दुर्घटना हुनबाट त बचाउन सक्दैनन् नि हैन र?
उहाँले भन्नुभयो स्कुटर किन्छन् डेढ लाखको हेल्मेट पाँच सयको। हेल्मेट जति सयको किनुन उहाँको चासोको विषय भएन। हजारौँ खर्च गरुन् या पाँचसय हेल्मेटले गर्ने काम गरे भैहाल्यो नि, पैसा कति पर्यो, कुन स्कुटर चालकले कतिमा हेल्मेट किन्यो भन्ने कुरामा किन निधीखुदि। आफ्नो काममा पो चासो राख्नु। उहाँको काम सुरक्षामा चासो राख्ने हो केटीले लगाउने लुगा, हेल्मेट र कपालको जुरोमा हैन।
केही समय पहिले पुरुषभन्दा महिला चालकले चलाएको सवारी साधन कम दुर्घटना हुने गरेको कुरा ट्राफिक प्रहरीको तथ्याङकमा देखाएको छ। नेपालमा मात्रै हैन भारतमा पनि २०१० देखि ०१२ को तथ्याङक हेर्दा महिला चालकले नै सुरक्षित सवारी साधन चलाउने कुरा उल्लेख गरिएको छ। यो कुराले पनि पुष्टि गर्छ कि महिला चालक त्यति कमजोर छैनन् र सामान्य कुराले हडबडाएर दुर्घटना गराउन सक्छन् ।
हुन त म स्कुटर चालक हैन, चलाउन पनि आउदैन । तर नियमित स्कुटर प्रयोगकर्ता भने पक्कै हुँ । तर आजसम्म छोटो लुगा लगाएर या कपाल जुरो बनाएर स्कुटर दुर्घटना भएको देखेको छैन। तर, यो पक्कै देखेको छु कि,पुरै लुगा लगाएर सवारी चलाईरहेकाहरुले महिला चालकलाई ओभरटेक गर्न खोज्ने, जिस्काउने,हेप्ने र विभिन्न वाहानामा दुव्र्यवहार गर्न खोज्ने। सस्तो लोकप्रियताको लागि यस्ता समाचारलाई प्राथमिकता नदिएकै राम्रो।
तपाईको अनलाईन पढ्ने म जस्ता धेरै पाठक छन् जसले यस्ता एकतर्फि समाचार,पुर्वाग्रही समाचार र त्यसले उब्जाउने नकारात्मकतालाई चुपचाप सहन गर्न सक्दैनन् । हुन त त्यो समाचारको लागि तपाईको टिमले एकदमै अनुसन्धान, अध्ययन गरेको होला तर पनि त्यसले पाठकमा पार्ने असरको बारेमा पनि ख्याल गर्नु आवश्यक छ नि हैन र ? म सेतोपाटी सुरु भएदेखि नै नियमीत रुपमा हेर्ने र पढ्ने गरेको छु तर यस्ता खालका समाचारले विस्तारै त्यसप्रतिको आशक्ति घट्दै जादो रैछ।
र अन्त्यमा कुनै पनि विषय चाहे त्यो व्यक्तिगत होस् चाहे सामाजिक, पुर्वाग्रहको गन्ध नआवोस् कसैले भन्दैमा त्यो सहि नै हुन्छ भन्ने छैन, के सहि र के गलत हो आफैले मनन गर्नु होला। म एउटा पाठकको आग्रह। धन्यवाद ।