श्रीमान् अख्तियार प्रमुख ज्यु,
नमस्कार।
हजुर आराम हुनुहुन्छ भन्ने मेरो बिश्वास छ। हुलाकमार्फत् पत्र पठाऊ भने पुग्ने/नपुग्ने अत्तोपत्तो हुँदैन। इमेल/इन्टरनेटको पनि केही भर छैन गोरखामा। कहीँले काहीँ आउँछ, छिनमै हराउँछ। हजुरलाई यस सेतोपाटी डिजिटल पत्रिकामार्फत् पत्र पठाएको छु। पत्रिका पढ्ने हजुरको बाँनी छ भन्नेमा मेरो बिश्वास छ।
र, सुरुमै निवेदन गरेँ, कालीको भक्तले यहाँ माछा उम्काउन खेल खेलेका छन्। उनीहरुलाई कानूनअनुसार कारबाही गर्नुपर्यो। ‘जो चोर उसकै ठूलो स्वर' भनेझैं भएको छ आजकल गोरखामा। हजुरले यो खेललाई सानो खेलको रुपमा लिनुहुनेछैन।
हजुरलाई म पहिले घटनाक्रमबारे जानकारी गराउँछु।
गोरखा नगरपालिका –११ दशकिलोकी सुन्तली थापासँग घुस लिएर नगरपालिकाका प्रबक्ता तथा सब–ईञ्जिनियर निशान पाठकले घर सम्पन्नताको प्रमाणपत्र बनाएछन्। घरधनी थापासँग लिएको १५ हजार रुपैंया वल्डक्यापिटल कन्सल्टेन्सी एक ईञ्जिनियर सनद श्रेष्ठमार्फत् पाठकले घुस लिएको श्रेष्ठ स्वीर्काछन्।
नगरपालिकाको कार्यकारी अधिकृत चन्द्रा थापा मगर, फाँटवाला कर्मचारी रमण कट्टेलको किर्ते सही र छाप लगाएर पाठकले सेवाग्राही थापाको घर सम्पन्नताको प्रमाणपत्र थमाएको हालै खुलासा भएको हो। पत्रिकाले बेरेर घर सम्पन्नताको प्रमाणपत्र वल्डक्यापिटल कन्सल्टेन्सी ईञ्जिनियर श्रेष्ठलाई पाठकले नपा कार्यालय अघिको चौतारामा बुझाएका थिए। श्रेष्ठले घरधनी थापालाई उक्त प्रमाणपत्र बुझाएर फर्केको स्वीकार गरेका छन्।
यी सबै घटनाक्रमः त्यतिवेला मात्रै थाहा भयो, जतिवेला कार्यकारी अधिकृत चन्द्रा थापा मगरले किर्ते सहिछाप गरी प्रमाणपत्र दिएकोबारे आवश्यक छानबीन गरी कारबाहीका लागि जिल्ला प्रहरी कार्यालय गोरखामा उजुरी दर्ता गरिन्। गत चैत १० मंगलबार दिउँसो कार्यकारी अधिकृत मगरले जिप्रकामा सरकारी सहिछाप किर्ते गरेकोबारे उजुरी दर्ता गरेकी थिइन्। चैत्र १० गते राति ११ बजेतिर प्रहरी टोलीले नगरपालिकाका सब–ईञ्जिनियर पाठकसहित, पूर्व नपा कर्मचारी तथा कन्सल्टेन्सी ईञ्जिनियर श्रेष्ठ र सेवाग्राही थापालाई उनीहरुकै घर/कोठाबाट पक्राउ गरी जिप्रका ल्यायो।
प्रहरीले उजुरी उपर अनुसन्धान थाल्यो। गत माघ ११ गते घर निर्माणको स्थायी इजाजत र सम्पन्नताको प्रमाणपत्र सबईञ्जिनियर पाठकको टोलीले सेवाग्राही थापालाई दिएको खुल्यो। नगरपालिकाको शहरी बिकास शाखामा सेवाग्राही थापाको फाइल छैन। कसले गायब बनायो र कहाँ लुकायो, फाल्यो भन्नेबारे अझै खुलेको छैन। सहीछाप किर्ते गर्ने टोलीले कतिसम्म गरेछन् भने कार्यकारी अधिकृत मगरको हस्ताक्षर माघ ११ गते गरेछन्। फाँट परिवर्तन गरी वडा सचिब सम्हालेका रमण कट्टेलको सही भने माघ १३ गते गरेछन्। किर्ते टोली यहाँनेर चुक्यो। पहिले फाँटवाला कर्मचारीको हस्ताक्षरपछि मात्रै कार्यकारी अधिकृतले हस्ताक्षर गर्ने र सेवाग्राहीले प्रमाणपत्र बुझ्छन्। तर ठ्याक्कै उल्टो भयो, पहिले कार्यकारीको हस्ताक्षर अनि दुई दिनपछि मात्रै फाँटवाला कर्मचारीको। कर्मचारी पनि फाँट छाडिसेका कट्टेलको। कट्टेललाई अहिले वडा सचिबको जिम्मेवारी छ। पहिले उनी शहरी विकास शाखामा थिए। किर्ते टोलीले सडक मापदण्ड (२५) मिटर मापदण्ड बिपरीत बनेको घर सम्पन्नताको प्रमाणपत्र दिएका थिए।
अभियुक्तहरु छुटाउन को–को लागे हेर्नुस् न।
पक्राउ परेका पाठकलाई छुटाउन नेकपा एमालेका केन्द्रीय तथा जिल्लास्तरका नेताको टोली लागिपरेको छ। गृहमन्त्री बामदेव गौतम, पश्चिमाञ्चल क्षेत्रिय प्रहरी कार्यालयका प्रमुख डीआइजी पंकज श्रेष्ठलगायतको टोलीले पाठकलाई कारबाही नगर्न प्रहरी नायब उपरीक्षक अर्जुन चन्द ठकुरीलाई टेलिफोन गरेका छन्।
गृहमन्त्री गौतमले प्रमुख जिल्ला अधिकारी उद्धव तिमेल्सेनालाई टेलिफोन गरेर पाठकबिरुद्ध मुद्दा नचलाउन र छाड्न दबाब दिएका थिए। उनीहरुले चैत्र ११ गते टेलिफोन गरी दबाब दिएको स्रोतको दावी छ। दबाब झेल्दै प्रनाउ ठकुरीले चैत्र ११ गते अपरान्ह करीब चार बजे पाठक, श्रेष्ठ र सेवाग्राही थापा बिरुद्ध सरकारी सहीछाप किर्ते गरेको अभियोगमा मुद्दा दर्ता गरी अनुसन्धान प्रक्रिया अघि बढाउन जिल्ला अदालत गोरखाबाट १० दिनको म्याद लियो।
श्रेष्ठलाई छुटाउन एमाओवादीको जिल्ला, केन्द्रका नेताहरु लागिपरेका छन्। एमाओबादी नेता नारायणकाजी श्रेष्ठ (गृह जिल्ला गोरखा) ले छुटाउन टेलिफोन गरेको प्रहरी स्रोत बताउँछ। सेवाग्राही थापालाई छुटाउन केही स्थानीय बासिन्दाले प्रहरीलाई दबाब दिएपनि राजनीतिक दलले भने खासै उनको पक्षमा बोलेका छैनन्।
अख्तियारले गत माघ १३ गते जिल्लाको अख्तियार दुरुपयोग सम्बन्धी हेर्ने अधिकार प्रमुख जिल्ला अधिकारीलाई दिएको थियो। नगरपालिकामा भएको किर्ते हस्ताक्षरको कुराबारे छलफल गर्न चाहने प्रमुख जिल्ला अधिकारी तिमेल्सेनालगायतको टोली १५ हजार घुसको कुरा सुन्न पनि चाहँदैन। घुस प्रकरणबारेका समाचारहरु छताछुल्ल हुनेगरी प्रकाशित, प्रशारण हुँदा समेत प्रजिअ तिमेल्सेनाको कान खुलेको छैन। उहाँकै मजकुर गृह मन्त्रालयले सहीछाप किर्ते गरेको घुस लिएको आरोपमा तीन जनालाई पक्राउ गरेर मुद्दा दर्ता गर्दा समेत किन जिल्लाको अख्तियार प्रमुखको जिम्मेवारी सम्हालेका प्रजिअ तिमेल्सेना मौन छन्? भन्ने बुझिएको छैन। अभियुक्तहरुलाई कानूनअनुसार कारबाही प्रक्रिया सुरु गर्न प्रोत्साहन गर्नुको सट्टा किन प्रजिअ तिमेल्सेनाले प्रनाउ ठकुरीलाई अभियुक्त छोड्न दबाब दिए?
अख्यितार प्रमुख लोकमानसिंह कार्की ज्यु, तपाइँहरुले अख्तियार दुरुपयोग सम्बन्धी जिल्लामा हुने घटनाको आवश्यक कारबाही गर्न सक्ने अधिकार दिएको ब्यक्ति प्रजिअहरुले मजकुरको निर्णय कार्यान्वयन गरेका छैनन्। ठाँडै लत्याइदिए प्रजिअले हजुरहरुको बिश्वास। अनि घुस खाने अभियोग लागेकाहरुलाई छुटाउन र सफाइ दिन पो लागिरहेका छन् त अहिले प्रजिअको टोली। अख्तियारको क्षेत्रिय कार्यालय पोखरा हुँदै हजुरहरु कहाँ गोरखामा भएको किर्ते प्रकरण र घुस प्रकरणका तथ्यगत सामग्री पुगेकै थिए भन्ने लाग्छ। तर, के गर्नु कानून कार्यान्वयन गर्ने निकाय नै मौन बसेपछि।
अब अन्त्यमा अहिले के भैरहेको छ? हजुरलाई जानकारी गराउँछु।
एमाले, एमाओवादी त अभियुक्तहरु छुटाउन कम्मर कसेर लागेको माथि उल्लेख गरिहाले। पढ्नुभयो भन्ने बिश्वास छ। हजुरकै बोली सापटी लिँदा ‘कालीको भक्त' अख्तियारको जिम्मेवारीप्राप्त ब्यक्ति प्रजिअ तिमेल्सेना पनि अभियुक्तहरु छुटाउन लागिपरेकै छन्। हेर्नुस् न ‘न्यान नपाए गोरखा आउनू' भन्ने उखान कालीका भक्तहरुले लत्याएका। कालिकै काखमा बसेर घुस प्रकरणबारे मौन बस्ने प्रजिअलाई किन कारबाही हुँदैन? होस् पनि कसरी गृह मन्त्रालयको प्रमुख गृहमन्त्री बामदेव गौतम नै अभियुक्त पाठक छुटाउन लागिपरेका छन्।
जाबो १५ हजार त हो नि भनेर घुस प्रकरणलाई तुहाउन खोजिएको छ। मलाई बिश्वास छ दोषी उपर कारबाही होस् र घुस खाने, खान प्रोत्साहन गर्ने, सहयोग गर्ने र घुस खाएको स्वीकार गरेपछि पनि कारबाहीको सट्टा छुटाउन दबाब दिनेहरुलाई हजुरले कारबाहीको प्रक्रियामा लैजानुहुनेछ। अहिले अभियुक्तहरु छुटाउन लागिपरेका एमाले, एमाओवादीले कार्यकारी अधिकृत चन्द्रा थापा मगरको सरुवा गर्नुपर्छ भन्ने आवाज उठाउन थालेका छन्। कार्यकारी अधिकृत सरुवा गरेपछि कारबाही छोट्याएर फेरि पाठकलाई नगरपालिकाको कार्यालयमा पुनःबहालीको प्रक्रियामा बिचौलिया टोली लागेको प्रष्ट छ।
हेर्नुस् न नयाँ रणनीति यस्तो बन्दै रहेछ। एमाले, एमाओवादीले कार्यकारी सरुवा गर्ने माग अघि तेर्साउने तयारी गरेका रहेछन्। त्यस माग उपर नेपाली कांग्रेसले कार्यकारी सरुवा गर्न हुन्न भन्ने अडान राख्ने र अभियुक्तहरु छुटाउन कार्यकारीको सरुवा रोक्ने चलखेल भएको छ। नगरपालिकाका एक कर्मचारीले नयाँ रणनीतिबारे जानकारी दिँदै भनेका छन्, ‘कार्यकारी सरुवा गर्नुपर्छ भन्ने बार्गेनिङ बटमलाइन बनाएर अभियुक्तहरुलाई छोड्ने तयारी गरेका छन्। किर्ते र घुसको जुवामा कार्यकारीलाई च्याँखे थाप्ने काम भयो हजुर।' घर सम्पन्नताको प्रमाणपत्र लिँदा सेवाग्राहीले एक रुपैंयापनि पैसा तिर्न नपर्ने भएपनि यसअघि पाठकले सेवाग्राहीसँग ‘बिना पैसा पनि काम हुन्छ?' भन्दै हजारौं लिने गरेको सेवाग्राही बताउँछन्।
यसअघि पनि छुटेका थिए पाठक
पाठक पहिले जिल्ला विकास समितिको कार्यालयमा जागिरे थिए। त्यसबेला योजना अनुगमन गरेर सम्पन्न भएको भन्नुपर्नेमा उनले अनुगमन बेगर नै योजना सम्पन्न भएको सही गरेपछि जागिरबाट हात धुनुपरेको थियो। उनलाई त्यसबेला खासै कारबाही भएन। फाल्तु बसेका पाठकलाई नेकपा एमालेले गोरखा नगरपालिकामा जागिरे बनायो। जता घडेरी उतै सडक खन्ने गरेको, नपाको कार्यालय समयमा कार्यालय नबस्ने, अरु कर्मचारीलाई नटेर्ने, सेवाग्राहीको नक्शा आफैं बनाउने आफैं पास गर्ने जस्ता आरोप पाठक माथि छ। उनको आफ्नै कन्सल्टेन्सी छ।
राजा ज्ञानेन्द्रले शासन हातमा लिएको अवस्थामा नपाका तत्कालीन मेहर मानबहादुर श्रेष्ठले पाठकलाई थुनेका थिए। रोक्का गरेको जग्गाको फुकूवा सिफारिस आफू नभएको बेलामा सेवाग्राहीलाई दिएको भन्दै मेहर श्रेष्ठले पाठकलाई थुनेका हुन्।
मेहरको कार्यकक्षमा रहेको छाप झिकेर आफैं निमित्त कार्यालय प्रमुख भई पाठकले जग्गा फुकूवाको सिफारिस गोनपा ५ बतासेका एक सेवाग्राहीलाई दिए। जनआन्दोलन सफल भएपछि प्रहरी थुनामा रहेका अरु थुनुवाहरुसँगै पाठक पनि थुनामुक्त भए र उक्त सेवाग्राहीको जग्गा पाठकले किने।
यस्तो छवी बिग्रेका पाठक किर्ते सहीछाप सम्बन्धी मुद्दामा यसअघि पनि थुनामा बसेका थिए। तर, त्यसबेला कानूनअनुसार कारबाही भोगेनन्। त्यसैले लोकमान ज्यू, अख्तियारको दुरुपयोग गर्नेलाई अब कारबाही गर्नु हुन्छ कि हुँदैन? हामीले हेर्ने बेला आएको छ। तत्कालीन राजा राम शाहको उक्ति ‘न्याय नपाए गोरखा जानू' लाई अख्तियार दुरुपयोग अनुसन्धान आयोगका प्रमुखको हैसियले न्याय दिलाउनुपर्यो नि। होइन र? कि घुस खानेहरुलाई अझै प्रोत्साहन गर्ने हो? अन्तमा आग्रह गरे, सानो माछा भनेर नछाड्नुहोला। ठूलो माछा त हजुरले अहिलेसम्म हात पार्नुभएको देखेको छैन।
प्रजिअले कारबाहीको सट्टा छुटकारा रोजे, तपाइँ के रोज्नुहुन्छ हेर्न बाँकी छ।
हवस् त नमस्कार।
