युवावर्गले देशको हरेक क्षेत्र राजनैतिक, प्रशासनिक, निजी क्षेत्रमा भूमिका पाउनु पर्छ भन्ने विचार राख्ने म जस्ता व्यक्तिलाई भावना घिमिरेको क्रिकेट संघ नेपालमा प्रमुख कार्यकारी अधिकृत नियुक्ति हुँदा खुसी लागेकोे छ। यहाँनिर एउटा मनन योग्य कुरा के छ भने यदी नेपाली अधिकारीहरु मात्र छनोट प्रक्रियामा रहेका भए भावनाको नियुक्ति शायद कठिन हुन्थ्यो होला।
तर अर्न्तराष्ट्रिय क्रिकेट संघको पनि छनोट प्रक्रियामा संलग्नताले गर्दा छनोट प्रक्रिया निष्पक्ष हुन गई भावनाको छनोट हुन गएको हुनुपर्छ। यस अर्थमा एउटा महत्वपूर्ण पक्ष के छ भने भावनाको कार्य संपादनलाई आइ.सी.सी.ले नियालीरहेको मात्र हुने छैन परेको बेला उनी उक्त संस्थासंग प्रत्यक्ष सम्पर्कमा रहन सक्छिन्।
यो उनीको लागि सकारात्मक पक्ष हो। केही दिनअघि अखवारमा प्रकाशित समाचारमा भावनालाई पहिलो गाँसमा ढुंगा भएको अनुभूत भएको हुनुपर्छ। प्रकाशित समाचार अनुसार उनी कार्यालयमा उपस्थित हुँदा केही कर्मचारी नदेखिएको, उनको कार्य विवरण पनि नभएको कुरा प्रकाशमा आएको थियो।
भावनाले बुझ्नु पर्ने कुरा के हो भने यो देशमा संगठन व्यवस्थित रुपमा चलेका हुँदैनन्। तसर्थ त्यसलाई व्यवस्थित गराउन संगठन प्रमुखको हात रहन्छ। यस मानेमा अब भावना आफैले आफ्नो कार्य विवरण र कार्य योजना तयार गरी काम शुरु गर्नु बुद्धिमानी हुन्छ।
भावनाको नियुक्ति यस्तो समयमा भएको छ जहाँ नेपाली क्रिकेटलाई अगाडि बढाउन प्रचुर सम्भावना छ। नेपालका युवादेेखि वृद्ध सम्म, राजनीतिक दलका नेतादेखि निजी क्षेत्रका व्यक्तिहरु, स्वदेश र विदेशमा रहेका नेपालीहरु क्रिकेटप्रति सद्भाव राख्छन्। वर्तमान खेलकुदमन्त्रीज्यू देखि अर्थमन्त्रीज्यू समेत क्रिकेटमा रुची राख्नु हुन्छ। यही कारणले गर्दा सरकारले मूलपानीमा क्रिकेट मैदान बनाउने कार्यक्रमको थालनी भएको छ। नेपालको क्रिकेटको विकासको लागि भावनाको नेतृत्वमा निम्न लिखित कार्यहरु शुरु गर्न उपयुक्त हुनेछ।
(१) निजी क्षेत्रलाई परिचालित गरेर क्रिकेट विकास कोषको स्थापना गर्ने। यसमा क्रिकेटमा चाख राख्ने सर्वसाधारण नेपाली, गैर–आवसीय नेपाली, उद्योगपतिहरुलाई परिचालन गर्न सकिन्छ। कोषको सही परिचालनको लागि समाजले विश्वास गरेका विशिष्ट व्यक्तिहरुको एउटा सल्लाहकार टोली बनाउनु उपयुक्त हुन्छ।
(२) मूलपानीको अलावा अर्काे दुई वटा अर्न्तराष्ट्रियस्तरको क्रिकेट मैदान तयार गरी अर्न्तराष्ट्रिय म्याचहरु खेलाउन सकिन्छ। केही वर्षअघि आइसिसीले भारत पाकिस्तानको किक्रेट म्याचको लागि न्यूट्रल भेन्यूको रुपमा नेपाललाई पनि प्रस्ताव गरेको थियो। तर केही राजनीतिक कारणबस त्यो कार्यान्वयनहुन सकेन। यस अवस्थामा क्यानले पून एकपटक आइसिसीलाई अनुरोध गरी २–३ वटा अर्न्तराष्ट्रिय स्तरको क्रिकेट मैदान बनाउन सके यसले नेपालको क्रिकेटको विकासको लागि महत्वपूर्ण योगदान पुर्याउन सक्ने मात्र होइन नेपालको पर्यटन उद्योगलाई पनि ठूलो राहत मिल्न जान्छ।
(३) माथि उल्लेख गरिएको दुई मुख्य विषय बाहेक नेपालमा क्रिकेटको समग्र विकासको लागि पाँच वर्षे रणनीति बनाएर कार्यान्वयन गर्नु पनि उपयुक्त हुन्छ। यस प्रकारको नीति तर्जुमा गर्दा सरोकारवालाहरुको अधिकतम सहभागिता जरुरी हुन्छ।
नेपालको क्रिकेटको विकासको यो महत्वपूर्ण घडीमा प्रमुख कार्यकारी अधिकृतको रुपमा नियुक्त हुनु भएको भावना घिमिरेलाई बधाई दिन चाहन्छु। साना मसिना कुराबाट विचलित नभई अगाडि बढ्नुभयो भने तपाईले क्रिकेटप्रेमी नेपालीहरुबाट प्रशस्त सहयोग पाउनु हुनेछ।
तपाईको कार्यकालको सफलताको कामनागर्दछु।
