छिनछिनको समाचार र दिनदिनको विश्लेषणसँगै गम्भीर विषयका खोजी समाचारको प्रयासमा सेतोपाटी डिजिटल पत्रिकाले ६ महिनाको यात्रा पूरा गर्न लागेको छ।
छोटो अवधिमै पाठकहरूबाट प्राप्त विश्वास र भरोसालाई हामी डिजिटल माध्यमबाट जिम्मेवार पत्रकारिता गर्न थप प्रोत्साहित भएका छौं।
लोकतन्त्रको मूल्य–मान्यता, राष्ट्रियताको पक्षपोषण, सुशासन र पारदर्शिता, सामाजिक परिवर्तन, नागरिकहरूको हक–अधिकार र स्वाभिमानप्रति हामी सदैव चनाखो रहन्छौं।
सेतोपाटीको जन्म र अस्तित्व व्यवसायिक र निष्पक्ष पत्रकारिताको लक्ष्यमा एउटा घटना हो। यो विशुद्ध रूपमा व्यवसायिक पत्रकारहरूको पहल र लगानीमा खुलेको संस्था हो। सेतोपाटीमा कार्यरत पत्रकारहरूबाहेक यस संस्थामा कसैको लगानी छैन भन्ने हामी पाठकहरूमा स्पष्ट पार्न चाहन्छौं।
हामीसँग विभिन्न सञ्चारमाध्यमहरूमा लामो समयसम्म काम गर्दाको गहन र कतिपय सन्दर्भमा कठोर अनुभव छ। यिनै अनुभवका आधारमा हामी सेतोपाटीलाई सही सूचना प्रवाहको दायित्वबाट पछि नहट्ने एउटा सशक्त 'सार्वजनिक मञ्च' बनाउन चाहन्छौं।
हामीले अहिलेसम्म विज्ञापन लिएका छैनौं। धेरै पाठक तथा शुभेच्छुकहरूले सेतोपाटीलाई व्यवसायिक सञ्चारसंस्थाका रूपमा कसरी अघि बढाउन सकिन्छ भनेर स्वस्फुर्त रूपमा प्रसस्तै सुझाव पठाउनुभएको छ।
सेतोपाटीको व्यवसायिक मोडल कस्तो हुनसक्छ भन्ने सवालको टुङ्गो हामी आदरणीय पाठक र शुभेच्छुकहरूसँगको वृहत संवादमार्फत गर्न चाहन्छौं।
हाम्रा प्रत्येक आदरणीय पाठकहरूलाई आफ्नो विचार राखिदिन र अमूल्य सुझाव दिन यो संवादमा हार्दिक आमन्त्रण गर्दछौं।
तपाईंहरूका विचार र सुझाव info@setopati.com मा पठाइदिनुहुन अनुरोध छ। धन्यवाद।
