नेपाल वायुसेवा निगमको नयाँ जहाज सगरमाथालाई भारतले नयाँदिल्ली उडान गर्न अन्ततःअनुमति दिएको छ। भारतीय नागरिक उड्डय महानिर्देशकको कार्यालयले बुधबार राति अनुमति दिएको हो।
यसअघि निगमले बुधबार बिहान ८ बजेका लागि तय गरेको दिल्ली उडान भारतीय पक्षले अनुमति नदिएका कारण स्थगित भएको थियो।
'भारतीय नागरिक उड्डयन महानिर्देशकको कार्यालयले बुधबार रातिमात्र हाम्रो नयाँ जहाजलाई दिल्ली उडान गर्न अनुमति दिएको छ,' निगमका प्रवक्ता रामहरि शर्माले भने, अब पर्सी शुक्रबार बिहान ८ बजेदेखि दिल्लीका लागि नियमित उडान भर्छौं।'
दिल्लीका लागि बनाइएको उडान तालिकामा बिहीबार उडान नपर्ने भएकाले शुक्रबारबाट नियमित दिल्ली उडान हुने शर्माले बताए। नयाँ जहाजले प्रत्येक सोम, बुध, शुक्र र शनिबार दिल्ली उडान गर्ने तालिका छ। बिहान ८ बजे जाने र उताबाट १०:४० बजे फर्कने तालिका निगमले तयार तयार पारेको छ।
सगरमाथा नाम दिइएको एयरबसबाट दिल्लीकालागि एकतर्फी भाडा ७ हजार ८४ र दुईतर्फी १५ हजार १ सय ११ तोकिएको छ । निगमले यो सहित १० वटा श्रेणीका टिकट खुल्ला गरेको छ। सबैभन्दा मंहगोमा एकतर्फी भाडा १५ हजार छ। भारतीय महानिर्देशनालायले निगमलाई दिएको अपरेशन अनुमतिको म्याद २०१५ जुलाई २८ सम्मको छ।
किन पाएन अनुमति
नेपाल वायु सेवा निगमको नयाँ जहाज एयर बस ३२०-२०० दिल्ली उड्ने कार्यक्रम थियो। २८ वर्षपछि ल्याइएको नयाँ जहाजको पहिलो उडानमा धेरैको चासो थियो।
बुधबार बिहान दिल्ली उड्न टिकट लिएका १ सय ३० यात्रु आ-आफ्नो सामान बोकेर समयमै त्रिभुवन विमानस्थल पुगे। तर उडान हुने कुनै संकेत थिएन। निगमले फ्लाइट क्यान्सिल भएको जानकारी गरायो। निगमको उडान रद्द वा ढिलो हुनु नौलो घटना होइन। तर, राष्ट्रिय ध्वजावाहक नयाँ जहाजको पहिलो उडानसँग नेपाली उड्डयन क्षेत्रको भावना पनि जोडिएको थियो।
निगमका अधिकारीले उडान रद्द हुनुको दोष आफ्नो पूर्वतयारीलाई नभई भारतीय पक्षलाई देखाएको छन्। निगम प्रवक्ता रामहरि शर्माका अनुसार भारतले निगमको इतिहास, विमान दर्ता, पछिल्लो पाँच वर्षमा नेपालमा भएका हवाइ दुर्घटनालगायत विवरण मागेको छ।
‘हामीसँग दिल्ली उडानको अस्थायी अनुमति थियो, तर उताबाट नयाँ एयरलाइन्सले उडान भर्न लागेजस्तो गरी कागजात माग गरियो,’ शर्माले सेतोपाटीसँग भने, ‘पहिले नै उडान गरेर रोकिएको एयरलाइन्सलाई यी सबै कागजात मागिँदैन, उहाँहरूले किन माग्नु भयो अचम्म लागेको छ।’
शर्माले यसलाई अचम्मको माने पनि निगमकै जहाज उडाइसकेका क्याप्टेन डिआर निरौलाले ती कागजात माग्नुमा अचम्म मान्नुपर्ने कुनै कारण नरहेको बताउँछन्। उनले भने, ‘निगम अधिकारीलाई उडान अनुमति सजिलै आइहाल्ने लागे पनि कुनै देशमा उडान बन्द भएपछि फेरि सुरु गर्न केही कागजात अवश्य पूरा गर्नुपर्छ।’
निगमले काठमाडौं-दिल्ली उडान बन्द भएपछि दिल्लीस्थित आफ्नो सम्पर्क कार्यालय पनि बन्द गरेको थियो। भारतलाई बन्द हुनुको कारणबारे जानकारीसमेत गराइएको थिएन, न त फेरि कहिलेदेखि सेवा सुरु हुन्छ भन्ने किसिमको जानकारी दिइएको थियो। ‘एक्कासि अहिले उडान गर्न लाग्दा भारतले नयाँ कागजात माग्नु स्वभाविक हो,’ निरौलाले भने।
उनका अनुसार हवाइ सुरक्षामा भारतले अपनाउने नीतिलाई निगम अधिकारीले खेलाँची मानकोले बुधबार निगमको नयाँ जहाजको उडान ‘पहिलो गासमै ढुंगा’ भएको हो। निगमले पठाएका कागजात हेरेर अनुमति दिन भारतलाई केही समय लाग्छ। अब शुक्रबारको उडान गर्न पनि राजनीतिक तहबाटै पहल हुनुपर्छ।
नयाँ जहाजको पहिलो उडान रद्द भएकाले खल्लो लागेको प्रवक्ता शर्मा बताउँछन्। ‘सुरुवात राम्रो भएन, के गर्ने?’ उनले भने।
तर सुरुवात राम्रो होस् भनेर प्रभावकारी तयारी निगमले नगरेको देखियो। उडान अनुमति नै नलिई उसले यात्रुलाई टिकट मात्र बेचेन, विमानस्थलसम्म बोलाएर अनावश्यक दु:खसमेत दियो।
‘किन टिकट बेचेको त?’
‘टिकट बेच्नै १०-१५ दिन लागिहाल्छ, उडान अनुमति आइहाल्ला भन्ने सोचियो,’ शर्माको जवाफ थियो।
घरेलु उडानजस्तै ठानेर विदेशमा उडान गर्न खोज्नु निगमको चरम लापरवाही भएको क्याप्टेन निरौला बताउँछन्। ‘भारतमा उडान अनुमतिमा समस्या भए पहिलो उडान बैंकक, हङकङ, मलेसियामा पनि त गर्न सकिन्थ्यो,’ उनको सुझाव थियो।
उडान रोकिएको यतिका वर्षपछि फेरि उडान गर्दा के-के कागजात चाहिन्छ भन्ने हेक्का पनि नराख्नु निगमको लापरवाही हो।
निगमले बुधबार टिकट काटेका यात्रुमध्ये केहीलाई अन्य एयरलाइन्समा बुधबारै दिल्ली पठाएको छ। केहीलाई शुक्रबार जाने व्यवस्था मिलाएको छ। तर नयाँ जहाज आएपछि पुनर्जीवन पाउने अशा गरिएको निगमको बजार र विश्वास भने झन् अव्यवस्थित हुने संकेत देखिएको छ।
यो पनि