लुम्बिनीसहित बुद्धसँग सम्बन्धित क्षेत्रलाई ‘बुद्ध सर्किट’ बनाएर पर्यटन प्रवद्र्धन गरिनुपर्ने चर्चा चलेसँगै लुम्बिनीमा स्तरीय होटल खुल्ने क्रम बढेको छ । विश्व शान्तिको मुहान लुम्बिनीमा राष्ट्रिय तथा अन्तर्राष्ट्रिय व्यक्तिहरूको चासो बढेपछि लुम्बिनी क्षेत्रमा पछिल्लो समयमा ठूला लगानीमा होटल खुल्न थालेका हुन् ।
लुम्बिनीको बृहत्तर गुरुयोजनाअनुरुप लुम्बिनीमा तीव्र गतिमा काम अगाडि बढ्नुका साथै भैरहवामा रहेको गौतम बुद्ध विमानस्थललाई स्तर वृद्धि गरी अन्तर्राष्ट्रियस्तरको बनाउने खबरले होटल व्यवसायमा लगानकर्ताहरू आकर्षित भएका हुन् ।
लुम्बिनीमा मात्रै पछिल्लो समयमा होटल सञ्चालनका लागि करोडौँ लगानी गरिएको छ । कतिपयले करोडौँको लगानीमा होटल सञ्चालन गरिसकेका छन् भने कतिपय जग्गा किनेर होटल बनाउने तरखरमा लागेका छन् । लुम्बिनीमा खुलेका होटलमा पर्यटकको चाप बढेर गएको छ भने भैरहवा र बुटवलका होटलहरू पनि खाली छैनन् । लुम्बिनीमा आउने उच्चस्तरका पर्यटकलाई ध्यानमा राखेर तीनतारे होटल खुल्ने क्रम बढेको हो ।
लुम्बिनीमा रहेका अधिकांश होटललाई स्तर वृद्धि गरिएको छ । यहाँ दर्जनौँ होटल खुल्ने क्रममा छन् । लुम्बिनीको ‘स्टार लेवल’का होटल होक्केसहित ‘टुरिस्ट लेवल’का १९ वटा होटल सञ्चालनमा रहेका छन् । त्यस्ता होटलमा होटल कासाई, ब्याम्बो रिसोर्ट, बुद्धमाया होटल, न्यू क्रिस्टल, होटल बुद्धमाया प्यालेसलगायतका छन् ।
होटल होक्के र होटल कासाई लुम्बिनी गुरुयोजनाभित्र रहेका पर्यटक लक्ष्यित होटलहरू हुन् । अन्य लुम्बिनी वरिपरि रहेका होटल हुन् । लुम्बिनी क्षेत्रमा होटल व्यवसायमा दिनप्रतिदिन लगानी बढिरेहको होटल व्यवसायी निर्मल श्रेष्ठले जानकारी दिनुभयो । व्यवसायी श्रेष्ठका अनुसार लुम्बिनीमा अहिले तारे होटलमा हुने सेवा सुविधासहितका होटल खुल्ने क्रम बढेको छ ।
उहाँका अनुसार लुम्बिनीसहित बुद्धसँग सम्बन्धित क्षेत्रलाई बुद्ध सर्किटका रुपमा विकास गर्न थालिएपछि लुम्बिनीमा स्तरीय होटल खोल्न थालिएको हो ।
लुम्बिनीका अतिरिक्त भैरहवामा पनि अहिले स्तरीय होटल खुल्न थालेका छन् । सिद्धार्थनगर नगरपालिकास“गै जोडिएको वसन्तपुर गाविसमा रु २५ करोड लगानीमा ¥याडिसन रिसोर्ट खुलेको छ । सीमा नाका वेलहियामा पाँच तारे होटल खुल्दैछ । तीन बिगाहा क्षेत्रफलमा फैलिएको रिसोर्टमा ४० कोठा छन् ।
भैरहवाको देवकोटा चोकमा दुई वर्ष अघिदेखि नान्स होटल सञ्चालनमा छ भने रु सात करोड लगानीमा भैरहवाको देवकोटा चोक नजिक होटल द ह्वाइट लोट्स सञ्चालनमा ल्याइएको होटल सञ्चालक श्रेष्ठले जानकारी दिए।
एक करोडसम्मको लगानीमा रुपन्देहीमा डेढ दर्जनभन्दा बढी होटल खुलेका छन् । भैरहवामा अन्तर्राष्ट्रिय विमानस्थल र लुम्बिनीलाई भारतसँगको बुद्ध सर्किटमा जोड्नेबित्तिकै होटलमा लगानी अझै बढ्ने लुम्बिनी होटल तथा रेस्टुराँ एसोसिएसनका अध्यक्ष मिथुनमान श्रेष्ठले जानकारी दिए। “भैरहवामा अन्तर्राष्ट्रिय विमानस्थल बनेपछि विदेशी पर्यटकको आवागमन अहिलेभन्दा बढ्ने भएकाले स्तरीय होटलको आवश्यकता अझै बढ्ने छ”, उनले भने।
लुम्बिनीमा आगामी एक वर्षभित्रमा रु एक अर्बभन्दा बढीको लगानी होटल व्यवसाय ओइरिने उनको अनुमान छ । लुम्बिनीमा होटल खोेल्न काठमाडौँ, पोखरा, पाल्पालगायतका स्थानबाट व्यवसायीहरू आएको सङ्घको भनाइ छ ।
लुम्बिनीमा मात्रै अहिले एक दर्जनको हाराहारीमा होटल बनिरहेको होटल व्यवसायी तथा होटल कासाईका महाप्रबन्धक विनेश मानन्धरले जानकारी दिए। एक वर्षमा लुम्बिनीमा होटल व्यवसायमा ५० करोडभन्दा बढी लगानी भएको उनले बताए। केही वर्ष भित्र यहाँको होटल व्यवसायमा अर्बौंको लगानी हुने देखिएको छ।
होटल खोल्न पोखरा र काठमाडौँका व्यवसायीले लुम्बिनी क्षेत्रमा जग्गा किनेर राखेका छन् । लुम्बिनीमा रु ४५ करोडको लगानीमा पवन समूहले पा“चतारे होटलको निर्माण थालेको छ । एकसय २० कोठाको यो होटल तीन वर्ष भित्र सञ्चालनमा ल्याउने समूहका प्रबन्ध निर्देशक पवन हलुवाईको भनाइ छ ।
त्यस्तै, सफल होटल व्यवसायी निर्मल श्रेष्ठ पनि पाल्पा र भैरहवामा होटल सञ्चालन गरेको अनुभवसँगै लुम्बिनीमा स्टार लेवलको होटल सञ्चालनको तयारीमा जुटेका छन्। उनले रु १२ करोडको लगानीमा लुम्बिनीमा आउने स्तरीय पर्यटकलाई लक्ष्यित गरी स्वीमिङ पुल, सौना, ज्याकुजीसहितको ६० कोठे विलाशी ‘होटल द रोयल रेसिडेन्सी’ खोल्न लागेको जानकारी दिए। लुम्बिनीलाई विश्व शान्तिको सहरका रुपमा विकास गर्ने योजनासँगै स्तरीय होटल खुल्ने क्रमले आर्थिक गतिविधि बढ्ने र रोजगारी सिर्जना हुने आशा यहाँका व्यापारी र स्थानीय जनतामा जगाइदिएको छ । रासस