चाँदी चोरी पैठारीको आरोपमा प्रहरीले भारतीय गाडी र स्टाफलाई पक्राउ गरेको विरोधमा विराटनगर भन्सार कार्यालय रानीका एजेन्टले आइतबार जाँचपास बन्द गराएका छन्। चाँदी तस्करीमा गाडीको दोष नरहेको भन्दै भन्सार एजेन्टले दिनभरि भन्सार जाँचपास अबरोध गरेका हुन्।
भन्सार सेवा महासंघमा आबद्ध एक एजेन्टले जाँचपास कागज गराएको लहरीमा चेकजाँच गर्दा शनिबार राति तीन किलो चाँदी बरामद भएको थियो। सशस्त्र प्रहरी भन्सार राजस्व गस्ती टोलीले चेकजाँच गर्दा चाँदीनिर्मित तीन किलो सामग्री फेला परेपछि प्रहरीले पक्राउ गरेको थियो।
भन्सार कार्यालयका अनुसार एजेन्टहरूले अबरोध गरेपछि आइतबार भारत तथा तेस्रो मुलुकका लागि निकासी/पैठारी हुने गाडी रोकिएका छन्। भन्सारका निमिक्त प्रमुख लव अधिकारीले भने, 'एजेन्टहरूले अबरोध गरेपछि जाँचपास भएन, भन्सार हाफ रहेकाले दिउँसो १ बजे नै बन्द भयो।'
चालकको सिटमा चाँदी भेटिएकाले भन्सार मिलेमतो नरहेको दाबी भन्सार एजेन्टको छ। 'एजेन्टको संलग्नता नरहेको हुनाले गाडी छोड्नुपर्छ भनेर हामीले सांकेतिक रुपमा जाँचपास बन्द गर्यौं,' भन्सार एजेन्ट महासंघका सल्लाहकार प्रवीण जोशीले भने, 'गाडी छोडे भोलिदेखि जाँचपास खुल्छ।'
भन्सार एजेन्ट संघका अध्यक्ष बिजेन्द्र परासरले चाँदीबारे प्रतिक्रिया दिएनन्। उनले सोमबारदेखि जाँचपास खुल्ने बताए। सशस्त्र प्रहरी स्रोत अनुसार एजेन्टकै मिलेमतोमा चाँदी पास गराउन खोजेको चालकले बताएपछि अनुसन्धानपछि मात्र गाडी छोड्न मिल्ने नमिल्ने टुंगो लाग्नेछ।
भारत पञ्जाबबाट विराटनगरस्थित एउटा कापी उद्योगका लागि पेपर बोकेर आएको लहरीमा शनिबार राति करिब ९ बजे राजश्व गस्तीले चेकजाँच गर्दा चाँदीका सामान भेटिएको थियो। चाँदीद्वारा निर्मित थाल, दियो, चम्चा, ट्रे, सिन्दुर राख्ने बट्टा बरामद गरिएको छ।
चाँदी तस्करीमा संलग्न भएको आरोपमा प्रहरीले लक्ष्मण राय, सह–चालक मञ्जित सिंह र चालक तथा गाडी मालिक अमृत सिंहलाई पक्राउ गरेको छ ।