धरान बजार अनुगमन गर्दै विभिन्न निकायका प्रमुखहरु। तस्बिरः भोजराज
चाडवाड नजिकिदै जाँदा धरानमा बजार अनुगमन गरिएको छ। तर, म्याद गुज्रेका तथा अखाद्य बस्तु फेला परे पनि कारबाहीमा खासै चासो नदेखाइएको पाइएको हो।
मंगलबार ढेडदर्जन पसलहरु अनुगमन भए। तर, तिनीहरुमा पाइएको अखाद्य बस्तु जफत र नष्ट गर्ने काम मात्रै भएको छ। 'पहिलो पटक चेतावनी स्वरुप जफत गर्दै नष्ट गरेका हौं।, अनुगमनमा रहेका इलाका प्रशासन कार्यालय धरानका प्रमुख सिताराम कार्कीले भने। होटल, मेडिकल हल तथा खाद्य बस्तुमा अनुगमन गरिएको थियो। होटलहरु फोहोर तथा दुर्गन्धित पाइए पनि सफा गर्न भन्दै निर्देशन दिइएको छ।
वर्षको एकपल्ट मात्रै गरिने यस्ता खाल्का अनुगमनले झनै व्यापारीहरु चनाखो हुने गरेका छन्। व्यापारीहरुले सानो पसलहरुलाई मात्रै अनुगमन गर्ने ठूला पसलहरुमा अनुगमन गर्न नसकेको भन्दै आक्रोससमेत पोखेको पाइयो। 'हामी साना व्यापारीलाई मात्रै अनुगमन गर्ने नाटक गरेको देखिन्छ।' एक व्यापारीले आक्रोसव्यक्त भाषा बोले।
बजारमा महंगी, कालोबजारी, मिसावट र व्यापक ठगी हुने गरेको छ। अझ दशैं र तिहार नजिकिदै गर्दा व्यापारीहरु यस्ता कार्यमा तल्लिन हुन्छन्। र, पनि कारबाही हुन नसक्दा उनीहरुको मनोबल बढिरहेको उपभोक्ताहरु बताउँछन्।
अधिकांस अनुगमन गरिएको पसलहरुमा मूल्य सूचि नभए पनि प्रशासनले त्यस तर्फ ध्यान नदिएको पाइयो। प्रमुख कार्की भन्छन् 'मूल्यसूचि राख्नु पर्ने हो तर, धेरैमा नराखेको पाइयो।, कारबाही हुन्न त? भन्ने जिज्ञासामा उनले आफूहरुलाई तत्कालै कारबाही गर्ने अधिकार नभएको उजुरी परेपछि मात्रै कारबाही गर्न सकिने दाबी गरे।
प्रशासनले धरान ५ महेन्द्रपथ र पुरानो बजारलगायतका पसलहरुमा अनुगमन गरेको थियो। चेतना मेडिकल हल, बाजे होटल, न्यु युनिक एण्ड स्न्याकबाट केही पेय पदार्थ र अखाद्य बस्तु जफत गर्दै नष्ट गरेको हो। त्यस्तै हलुवाई वेकारी क्याफे, निधि मेडीकल हललगायतमा समेत म्याद गुजि्रएको औषधि र केही सामग्री जफत गरेको हो।
अनुगमनमा धरान नगरपालीकाका सामाजिक अधिकृत सुनिल नेपाल, वडा प्रहरी कार्यालयका प्रतिनिधि, उपस्वास्थ्य चौकी धरानका दामोदर गौतम, आन्तरीक राजश्व कार्यलयका प्रदिप गुरागाई लगायत उवासंघमा प्रतिनिधिहरु उपभोक्ता हित संरक्षण मञ्चका क्षेत्रीय अध्यक्ष उद्धव श्रेष्ठ लगायत सहभागी थिए।
