केही दिनदेखि निरन्तर ओरालो लागेको नेपाल स्टक एक्सचेन्ज (नेप्से) परिसूचक आज ३६.६२ अङ्कले उकालो लागेको छ । अघिलो दिन सोमबार परिसूचक ३८ अङ्कले घटेको नेप्से हिजो मङ्गलबार २५.९८ अङ्कले तल झरेको थियो ।
नेपाल स्टक एक्सचेन्जका अनुसार आज परिसूचक ४.१८ प्रतिशतले घटेर ९६०.४३ विन्दुमा कायम भएको छ । त्यसैगरी सेयरको मूल्यका साथै कारोबारमा पनि सुधार देखिएको छ । नेप्सेमा रु ६१ करोड ७४ लाख ११ हजार ९२१ बराबरको १३ लाख २१ हजार ५०८ सेयर कारोबार भएका छन् ।
नेप्सेमा सबैभन्दा बढी बिमा कम्पनीका सेयर मूल्यमा २४८.९७ अङ्कले बढेको छ । यसपछि जलविद्युत् कम्पनीहरुको सेयरमा १७८.३५ अङ्कले बढेको छ । त्यसैगरी बैंकिङ समूह परिसूचकमा ३६.६६ अङ्कले बढेको छ भने उत्पादनमूलक क्षेत्रका सेयर परिसूचकमा २४.०३ अङ्कले बढोत्तरी भएको छ । तर होटल समूहको नेप्सेमा भने २.४९ अङ्कले गिरावट आएको छ । रासस
